Dzyudo bo‘yicha Parij—2024 yozgi Olimpiya o‘yinlari chempioni Diyora Keldiyorova ayni vaqtda jarohatlarini davolamoqda. Bu haqda uning o‘zi MOQ matbuot xizmatiga bergan intervyusida aytib o‘tdi.
Keldiyorova uni qachon tatamida ko‘rishlari haqidagi savolga javob berar ekan, hozir jarohatlarini davolayotganini aytdi.
“Shuning uchun aniq bilmayman. Kelgusi Olimpiadagacha yana 4 yil vaqtimiz bor. Shuning uchun ham hozir ozgina taʼtildamiz. O‘tgan Olimpiadada COVID-19 pandemiyasi bo‘lgani uchun Parij—2024 sikli qisqaroq bo‘ldi. So‘nggi 7 yil umuman dam olmadik, desam ham bo‘ladi. Shuning uchun ham hozir hordiq chiqaryapman va shu paytgacha bezovta qilgan barcha jarohatlarimni tuzatyapmiz”, degan Olimpiada chempioni.
Diyora Keldiyorovaning aytishicha, Yangi Olimpiada siklida vazn toifasini o‘zgartirmasligini aytdi.
Dzyudochi ushbu sohaga kirib kelayotgan yosh qizlar sezilarli darajada ko‘payib borayotgani haqida shunday dedi:
“Albatta, bundan juda xursandman. To‘g‘risi, dzyudoga kelayotgan qizlar bunchalik ko‘payishini kutmagan edim. O‘zbekistonda ayollar sportini rivojlanishi uchun ozgina bo‘lsa ham hissa qo‘shgan bo‘lsam, juda ham xursandman. Buning ortidan opa-singillarimiz sog‘lom turmush tarzini tanlashyapti. Sog‘lom onadan sog‘lom farzand dunyoga keladi. Bu, albatta, professional sportda ham mevasini ko‘rsatadi. Bizda (ayollar dzyudosida) raqobat unchalik ham kuchaymagandi. Chunki avval dzyudochi qizlar soni kam edi. O‘ylaymanki, yaqin davrda raqobatni bugungidan ham kuchaytiramiz. Har bir vaznda yetakchilikka daʼvogarlarni 10 taga yetkazib olsak, bu ayollar dzyudosida juda katta ko‘tarilish bo‘ladi”, degan Diyora Keldiyorova.
Izoh (0)