Prezident Shavkat Mirziyoev Parijdagi yozgi Olimpiya o‘yinlarida O‘zbekiston sport delegatsiyasiga navbatdagi oltin, kumush hamda bronza medallarini keltirgan sportchilar — bokschilar Bahodir Jalolov va Аbdumalik Halokov, erkin kurashchilar Razambek Jamalov va G‘ulomjon Аbdullaev, taekvondochi Svetlana Osipova va og‘ir atletikachi Аkbar Jo‘raev bilan telefon orqali muloqot qildi.
Davlat rahbari butun xalq nomidan chempion va sovrindorlarni samimiy tabriklab, murakkab kurashlarda ko‘rsatgan yuksak mahorati va matonati uchun minnatdorlik bildirdi. Ularning ota-onalari va murabbiylariga el-yurtga munosib shunday o‘g‘il-qizlarni tarbiyalagani uchun rahmat aytdi.
Sen O‘zbekiston ayollari orasida birinchi bo‘lib taekvondo bo‘yicha Olimpiya medali sovrindori bo‘lding. Barchamiz har bir chiqishingni hayajon bilan kuzatdik. Yuksak jang sanʼati va haqiqiy jangchi ruhini namoyish etding. Sen bilan juda faxrlanamiz, deydi prezident Svetlana Osipovaga.
Prezident ikki karra Olimpiada chempioni Bahodir Jalolov bilan suhbatda bokschini tarixiy g‘alaba bilan tabrikladi:
Eng og‘ir vaznda tengsiz ekaningni yana bir bor butun dunyoga ko‘rsatding. Bu bizlarga juda katta faxr, g‘urur-iftixor bag‘ishladi. Parijda ham oltin olib kelishga vaʼda bergan eding, bugungi tarixiy zafaring shu vaʼdaga mos bo‘ldi. Katta-katta g‘alabalar hali oldimizda. Poytaxtimizda nomingga ochilgan boks bo‘yicha sport mahorati maktabida yana yuzlab, minglab o‘zbek bahodirlari katta ringlarga tayyorlanishiga ishonaman.
Fursatdan foydalanib, davlat rahbari bokschilarning bosh murabbiysi To‘lqin Qilichev tezda sog‘ayib ketishini tiladi.
Sportchilar prezidentning shaxsiy eʼtibori ularga kuchli motivatsiya bergani, mukammal tayyorgarlik ko‘rishlari uchun barcha imkoniyat yaratilganini qayd etib, tashakkur izhor etdilar. O‘zbekiston sportining yangi tarixini yaratishda kelgusida ham astoydil mehnat qilishga, yanada yuksak marralarga erishishga vaʼda berdilar.
Izoh (0)