Ozarbayjon poytaxti Boku shahrida 29-maydan 4-iyunga qadar taekvondo WT bo‘yicha Jahon chempionati bo‘lib o‘tdi.
O‘zbekiston Jahon chempionatiga 16 nafar vakil (sakkiz nafar erkak, sakkiz nafar ayol) bilan yo‘l olgandi. Musobaqada o‘zbekistonlik sportchilar bitta kumush va uchta bronza medalini qo‘lga kiritdi. Bu orqali O‘zbekiston delegatsiyasi Jahon chempionatlarida medal qo‘lga kiritish bo‘yicha o‘z rekordini takrorladi.
Ayollar o‘rtasida +73 kg vazn toifasida finalga qadar yetib borgan Svetlana Osipova kumush medalni qo‘lga kiritdi. Shuningdek, Feruza Sodiqova (-62 kg) bronza medali bilan taqdirlandi.
Tokio—2020 Olimpiadasi g‘olibi Ulug‘bek Rashidov (-68 kg) ilk bor Jahon chempionatida shohsupaga ko‘tarildi. Rashidov bronza medalini qo‘lga kiritdi. Kattalar o‘rtasidagi dunyo birinchiligida debyut qilgan Omonjon Otajonov -54 kg vazn toifasida uchinchi pog‘onadan joy oldi.
Kumush medal
- +73 kg: Svetlana Osipova
Bronza medal
- -62 kg: Feruza Sodiqova
- -54 kg: Omonjon Otajonov
- -68 kg: Ulug‘bek Rashidov
Izoh (0)