O‘zbekiston suvereniteti va manfaatlariga zid fikr bildirayotgan ayrim rus siyosatchilari eskicha dunyoqarashga ega. Bu haqda deputat Bobur Bekmurodov “Daryo” muxbiri bilan suhbatda aytib o‘tdi.
Toshkent shahrida “Xalqaro hamkorlik tashabbuslari haftaligi” doirasida turli sohalarga oid muloqotlar bo‘lib o‘tmoqda. Bugun, 24-oktyabr kuni tashkil etilgan suhbat O‘zbekistonda erkin fuqarolik jamiyatini rivojlantirish mavzusida kechdi. Tadbir yakunida Oliy Majlis deputati, “Yuksalish” harakati raisi Bobur Bekmurodov “Daryo” muxbiriga intervyu berdi.
Savol: Oxirgi yillarda baʼzi rus siyosatchilari O‘zbekiston suvereniteti va manfaatlariga zid fikrlar bildirmoqda. Parlament va jamoatchilik bunday chiqishlarga javob qaytarishda nimalarga eʼtibor qaratishi zarur?
Bobur Bekmurodovning aytishicha, vaziyatga baho berishda ikki muhim jihatni inobatga olish kerak.
“Birinchidan, bunday gaplarni aytayotgan odamlar Rossiyada jamoatchilik fikrini shakllantirmaydi. Masalan, Mironov shu toifadan. Buni yaxshi tushunib olishimiz kerak. O‘zbekiston jamoatchiligi tahdidlarga nisbatan faol javob bermoqda. Suverenitetga qatʼiy turibdi. Biz odamlarimiz manfaatlariga zid bo‘lgan har qanaqa tajovuzli gapga qarshi turyapmiz. Bundan keyin ham qarshi turamiz”, dedi deputat.
Bobur Bekmurodov masalaga baho berishda ikkinchi jihat davlatlararo munosabatlar ekanini taʼkidladi.
“Rossiya bilan O‘zbekiston o‘rtasidagi iqtisodiy munosabatlar, parlamentlararo hamkorlik kengayib bormoqda. Bu hamkorlikdan ikki mamlakat ham yutyapti. Eski dunyoqarashdagi, hatto jamoatchilik fikrini shakllantirmaydigan ayrim rus siyosatchilari o‘zini katta og‘adek tutayotganini ko‘ryapmiz. Bu eskicha dunyoqarash. Agar Rossiyaning yosh, progressiv deputatlari bilan gaplashsangiz, ularda bunday fikrlar yo‘q. Shuning uchun eski dunyoqarashdagi rus siyosatchilari hamda O‘zbekiston va Rossiya o‘rtasidagi munosabatlarni ayri holda ko‘rish kerak”, deya fikr bildirdi “Yuksalish” harakati rahbari.
Xulosa qilar ekan, Bobur Bekmurodov suverenitet va manfaatlarga qarshi har qanaqa fikrlarga nisbatan O‘zbekiston jamoatchiligi qatʼiy turishi zarurligini aytdi.
“Qandaydir bir oddiy tarixchi gapirsa ham unga javob qilinyapti. Doim aytamanki, javoblar mutanosib bo‘lishi kerak. Rossiyada qaysidir fraksiya rahbari fikr bildirdimi, bizdan ham fraksiya rahbari javob berishi lozim. Oddiy o‘qituvchining gapiga katta siyosatchilar javob qaytarishi shart emas. Biz katta davlatmiz, aholimiz qariyb 40 millionga yaqinlashdi. O‘zbekiston buyuk tarixga ega. Shuning uchun o‘z darajamizni to‘g‘ri belgilab olishimiz kerak”, dedi mutaxassis.
Rus siyosatchilari tahdidlari
So‘ngi vaqtlarda ayrim rus siyosatchilari tomonidan Markaziy Osiyo davlatlari, xususan O‘zbekistonga nisbatan keskin fikrlar yangramoqda. Bunga nisbatan parlament va jamoatchilik faol munosabat bildiryapti. Masalan, 2024-yil 19-oktyabr kuni rossiyalik deputat Sergey Mironov O‘zbekistonning Qozon shahridagi Bosh konsulligi fuqarolarni Rossiya armiyasida xizmat qilmaslikka chaqirganidan so‘ng, O‘zbekiston bilan viza rejimini joriy qilish kerakligini aytgandi. Rus deputati fikrlariga nisbatan O‘zbekiston jamoatchiligi faol munosabat bildirdi.
Joriy yil sentyabrda Toshkent shahrida joylashgan maktabning rus tili darsida o‘qituvchi 6-sinf o‘quvchisini urgani aks etgan video tarqalgandi. Holatga Rossiya Tashqi ishlar vazirligi rasmiy vakili Mariya Zaxarova O‘zbekistondan bu holatga huquqiy baho berishni va bolaga nisbatan shafqatsizlik qilgan aybdorga qarshi choralar ko‘rishni so‘ragan.
“Bizning ichki ishlarimiz haqida bosh qotirguncha muammolarga to‘la o‘zlarining ishlari bilan shug‘ullanishsa, to‘g‘ri bo‘lar edi”, deya Zaxarovaga javob qaytargan “Milliy tiklanish” partiyasi deputati Alisher Qodirov. Keyin rossiyalik senator Andrey Klimov chiqish qilib, O‘zbekistonga Ukraina taqdiri haqida eslatgan.
2023-yil dekabrda rossiyalik yozuvchi Zaxar Prilepin sobiq SSSR hududlarini Rossiya tarkibiga qo‘shib olishni va uning aholisiga rus tilini o‘rgatishni taklif qilib chiqqandi. Bunga Rossiya Tashqi ishlar vazirligi munosabat bildirib, Zaxar Prilepin bayonoti uning shaxsiy fikri ekanini maʼlum qilgan.
O‘tgan yili yana bir rossiyalik deputat Yevgeniy Fyodorov sobiq sovet respublikalarini SSSRdan “noqonuniy ravishda ajralib chiqqan”ini aytib, Rossiya ertami-kechmi, ular bilan konfliktga borishi yoki urishishini aytgan.
Izoh (0)