Ukrainaning g‘alaba rejasi besh banddan iborat. Shuningdek, u uchta maxfiy qoidani o‘z ichiga oladi.
Sharqiy Yevropa hisobot byurosiga ko‘ra, bu haqda Oliy Radada rejani taqdim etgan Ukraina prezidenti Vladimir Zelenskiy aytib o‘tgan.
Zelenskiyning ma’lum qilishicha, birinchi band geosiyosiy masalalar, ikkinchi va uchinchisi harbiy masalalar bilan bog‘liq. To‘rtinchi band iqtisodiy sohaga, beshinchisi esa xavfsizlikka tegishli.
Uning so‘zlariga ko‘ra, asosiysi Ukrainaning NATOga integratsiyalashuv jarayonidir.
Rejaning mudofaa punkti maxfiy qo‘shimchaga ega va yordam ko‘rsatish uchun harbiy imkoniyatlarga ega bo‘lgan hamkorlar uchun ochiqdir. Uchinchi band ham AQSH, Buyuk Britaniya, Fransiya, Italiya va Germaniya rahbarlariga taqdim etiladigan maxfiy qismga ega.
Zelenskiy taqdim qilgan “g‘alaba rejasi” quyidagilardan iborat:
1. Urush tugagunga qadar Ukrainani NATOga qabul qilish.
2. Rossiya hududida operatsiyalarni davom ettirish va uning hududida zarba berish bo‘yicha cheklovlarni bekor qilish. Rossiya aviatsiyasini sheriklar bilan birgalikda mag‘lub etish, Ukraina dronlari va raketalaridan foydalanishni kengaytirish; hamkorlarning razvedka ma‘lumotlari bilan tanishib borish.
3. Ukraina hududida “yadroviy bo‘lmagan tiyib turish paket”ini joylashtirish.
4. Ukrainaning strategik va iqtisodiy salohiyatini rivojlantirish hamda Rossiyaga qarshi sanksiyalarni kuchaytirish.
5. Urush tugaganidan keyin Ukraina harbiylari NATO va Yevropa mudofaasini kuchaytirish uchun o‘z tajribasi bilan o‘rtoqlashishi mumkin. AQSHning Yevropadagi kontingenti o‘rnini Ukraina armiyasi egallashi mumkin.
Izoh (0)