Vashingtondagi NATO sammitida AQSH yetakchisi Jo Bayden va NATO rahbari Yens Stoltenberg Rossiya bilan urushning natijasi kelgusi o‘n yilliklar uchun global xavfsizlikni belgilashini aytib, Ukrainani faolroq qo‘llab-quvvatlashga chaqirdi.
NATO yetakchilari mazkur haftada alyans sammiti uchun Vashingtonga tashrif buyurgan edi. Yig‘ilish kun tartibidan Ukrainaga yordam ko‘rsatish, shuningdek, mudofaa va xavfsizlik sohasida birdamlikni mustahkamlash masalasi joy olgan.
NATOning 75 yilligiga bag‘ishlangan tadbirda Bayden “Ukraina Rossiya tajovuzi qarshisida ortga chekinmasligini” aytgan.
Yevropada Putinning Ukrainaga qarshi bosqinchilik urushi davom etmoqda. U Ukraina madaniyatini yo‘q qilmoqchi va mamlakatni xaritadan o‘chirmoqchi. Putin Ukraina bilan to‘xtab qolmaydi. Unutmangki, Ukraina ham Putinni to‘xtatishi mumkin, — deydi Bayden.
Shuningdek, Stoltenberg alyans davlatlarini Ukrainani faol qo‘llab-quvvatlashda davom ettirishga chaqirgan. U Rossiya bilan yo‘qotishlar va xavflarsiz kelishuvga erishilmasligini hamda eng katta xavf Rossiyaning Ukrainadagi g‘alabasi bo‘lishini aytgan. NATO rahbari bunga yo‘l qo‘yib bo‘lmasligini qo‘shimcha qilgan.
Bu nafaqat Putinga dalda beradi, balki Eron, Shimoliy Koreya va Xitoydagi boshqa avtoritar rahbarlarni ham ruhlantiradi. Ularning barchasi Rossiyaning shafqatsiz urushini qo‘llab-quvvatlaydi. Ularning barchasi NATO barbod bo‘lishini istaydi, — deya ta’kidlagan Stoltenberg.
Izoh (0)