Xitoy va Belarus hukumatlari NATO chegarasiga yaqin hududda qo‘shma harbiy mashg‘ulotlar amalga oshiradi. Bu haqda Belarus Mudofaa vazirligi tarqatgan xabarga asoslanib, CNN nashri xabar berdi.
Manbada keltirilishicha, mashg‘ulotlar Polsha chegarasidan bir necha chaqirim masofada o‘tkaziladi. Ularda qo‘shni mamlakat chegara va havo hududini buzuvchi harakatlar sodir etilishiga yo‘l qo‘yilmaydi.
Belarus Mudofaa vazirligi Xitoy Xalq ozodlik armiyasi qo‘shinlari Belarusga yetib kelganini tasdiqlagan. Ular ishtirokidagi harbiy manyovrlar 8-iyuldan 19-iyulgacha qadar, qariyb 11 kun davom etishi aytilgan.
7-iyul kuni Xitoy Mudofaa vazirligi Belarus bilan qo‘shma operatsiyalar yuzasidan qisqa bayonot eʼlon qilgan. Unda aytilishicha, mashg‘ulotlar “garovga olinganlarni qutqarish shartli operatsiyalari va terrorizmga qarshi missiyalar”ni o‘z ichiga oladi.
“O‘quv mashg‘ulotlarida qatnashuvchi qo‘shinlarning tayyorgarlik darajasi va muvofiqlashtirish imkoniyatlarini oshirish, shuningdek, ikki davlat armiyalari o‘rtasidagi amaliy hamkorlikni chuqurlashtirishga qaratilgan”, — deya qo‘shimcha qilingan Xitoy vazirligi xabarda.
Harbiy mashqlar Belarus-Polsha chegarasidagi Brest shahri yaqinida o‘tkazilishi belgilangan. Harbiy poligon Polsha poytaxti Varshavadan 209 kilometr va Minskning Ukraina bilan chegarasidan 64 kilometr uzoqlikda joylashgan.
Belarus 4-iyul kuni rasman SHHTga aʼzo bo‘lgan edi. Bu esa uning Xitoy bilan aloqalariga mantiqiy va qonuniy tus bergan. Hamkorlik doirasidagi birinchi amaliy qadamlar o‘laroq qo‘shma harbiy mashg‘ulotlar tashkil etilgan.
NATO rahbarlari Belarus va Xitoy harakatlarini provokatsiya sifatida qoralagan. Ushbu mashg‘ulotlar alyans chegarasi ortida qo‘rquv va vahima keltirib chiqarish uchun tashkil qilingani aytilgan.
Izoh (0)