Qozog‘iston 2024-yilning sakkiz oyida 3,13 million tonna bug‘doy eksport qildi. Bu o‘tgan yilning shu davriga (5,15 million tonna) nisbatan 39,2 foizga kam. Bu haqda savdo va integratsiya vaziri o‘rinbosari Qayrat To‘rebayevga tayanib, “Kursiv” xabar berdi.
Uning so‘zlariga ko‘ra, bug‘doy eksportining qisqarishi o‘tgan yilgi hosilning pastligi, shuningdek, Qozog‘iston uchun an’anaviy bozorlarda raqobatning kuchayishi bilan bog‘liq. Masalan, Italiya, Turkmaniston, Afg‘oniston va Rossiya Qozog‘iston bug‘doy iste’molini bir necha barobar kamaytirdi. Sababi boshqa don yetkazib beruvchilar eksport narxlarini pasaytirdi, bu esa Qozog‘iston mahsulotlarini siqib chiqarishga olib keldi.
Keyingi oziq-ovqat mavsumiga kelsak, Yevropa, Janubiy Afrika va Ukraina davlatlari noqulay ob-havo sharoiti tufayli bug‘doy yetishtirishni qisqartirdi. Shuningdek, Rossiya 2024—2025-yillarda 53 million tonna bug‘doy eksport qilishini aytdi, bu avvalgi mavsumga nisbatan 10,1 foizga kam.
12 million tonna donning 4,2 million tonnasi Markaziy Osiyo va Afg‘onistonga yetkazib berilishi kutilmoqda. Qozog‘iston 2023-yilda Xitoyga 1,4 million tonna don eksport qilgan, bu 2022-yilga nisbatan 5,5 barobar ko‘pdir. Shundan bug‘doy eksporti 538 ming tonnani tashkil etib, 15 barobar o‘sgan.
Izoh (0)