Германия ва АҚШдан ташқари Венгрия, Словакия, Бельгия, Словения ва Испания Украинани НАТОга таклиф қилишга қарши. Бу ҳақда тегишли манбаларга таяниб Politico хабар берди.
Нашрга кўра, альянснинг асосий аъзолари “Россия билан урушга тортилиш эҳтимолидан хавотирда”.
“Бельгия, Словения ёки Испания каби давлатлар АҚШ ва Германия ортига яширинган. Улар Украинанинг НАТОга киришини хоҳламайди”, дейди НАТО расмийларидан бири.
Альянснинг яна бир номи ошкор этилмаган вакилининг фикрича, бу давлатлар Украинани НАТОга таклиф қилишни “абстракт тарзда қўллаб-қувватламоқда”, бироқ “у амалга оширилгач, улар бу ғояга очиқчасига қарши чиқади”.
Politico’нинг аниқлик киритишича, Венгрия ва Словакия бош вазирлари Виктор Орбан ва Роберт Фицо турли мақсадларда йўл тутади ва “умуман Кремлпараст позицияни эгаллайди”. Нашр суҳбатдошларининг қўшимча қилишича, Қўшма Штатлар ва Германия келажакда, ҳарбий ҳаракатлар тугаганидан кейин Украинанинг кириб келишини истисно этмайди.
16 октябрь куни Украина президенти Владимир Зеленский Олий Радага ғалаба режасини тақдим этган эди. Ушбу режа беш банддан иборат. Режанинг биринчи банди Украинани ҳарбий можаро тугагунига қадар НАТОга аъзо бўлишини назарда тутади. Шунингдек, у учта махфий қоидани ўз ичига олади.
Аввалроқ Le Monde нашри АҚШ Украинанинг НАТОга аъзо бўлишига энди фундаментал эътирози йўқлигини ва Демократик партиядан номзод Камала Ҳаррис АҚШ президентлик сайловларида ғалаба қозонса, Жо Байден уни иттифоққа таклиф қилиши мумкинлиги ҳақида хабар берган эди.
Изоҳ (0)