NATO davlatlari AQSH prezidentlik saylovida Donald Tramp g‘alaba qozongan taqdirda, Ukrainaga yordam berishga qaratilgan chora-tadbirlar ishlab chiqdi, deya manbalarga tayanib, The Wall Street Journal xabar berdi.
Boshqa narsalar qatori, alyans Ukrainaga harbiy ta’minotni muvofiqlashtirish uchun mas’ul bo‘lgan yuqori martabali fuqarolik amaldorini yuboradi, — deyiladi xabarda.
Bundan tashqari, nashrga ko‘ra, Germaniyaning Visbaden shahrida harbiy texnika va qurol-yarog‘ yetkazib berish, shuningdek, Ukraina Qurolli kuchlari uchun o‘quv mashg‘ulotlarini muvofiqlashtirish uchun shtab tashkil etiladi. Harbiy yordam oqimini optimallashtirish va Ukrainaning yakunda alyansga a’zo bo‘lishi uchun ko‘prik yaratishga qaratilgan shtab-kvartira NATO missiyasining bir qismiga aylanadi.
WSJ ma’lumotlariga ko‘ra, chora-tadbirlar bir necha oy davomida ishlab chiqilmoqda, ammo Jo Bayden va Donald Tramp o‘rtasidagi bahsdan keyin yanada dolzarb bo‘lib qolgan. Reja, shuningdek, Ukraina armiyasining tayyorgarlik darajasini NATO mamlakatlari bilan yaqinlashtiradi. Ishlab chiqilgan tashabbuslar 9–11-iyul kunlari Vashingtonda bo‘lib o‘tadigan NATO sammitida eʼlon qilinishi kutilmoqda.
Sammitda NATO aʼzolari Ukrainani alyansga qo‘shilishga taklif qilmaydi, ammo uzoq muddatli moliyaviy yordam vaʼda qilishi mumkin. Xususan, NATO bosh kotibi Yens Stoltenberg alyansni Ukrainaga har yili 40 milliard yevro ajratish majburiyatini yuklashni taklif qilgan. Telegraph manbalariga tayanib, sammitda ittifoqchilar ushbu jarayonni qo‘llab-quvvatlash belgisi sifatida Ukrainaning NATOga kirishi bo‘yicha “yo‘l xaritasi”ni tasdiqlashni rejalashtirganini ma’lum qilgan.
Izoh (0)