Energetika infratuzilmasiga hujumlarni o‘zaro to‘xtatish Ukrainadagi faol harbiy harakatlarga barham berish yo‘lidagi birinchi qadam bo‘lishi mumkin. Bu haqda Ukraina prezidenti Vladimir Zelenskiy The Financial Times (FT) nashriga bergan intervyusida ma’lum qildi.
“Biz birinchi tinchlik sammitida ko‘rdikki, energiya xavfsizligini hal qilish mumkin, ya’ni biz ularning energetika infratuzilmasiga hujum qilmaymiz, ular esa bizning. Bu urushning tugashiga olib kelishi mumkinmi? Menimcha, ha!”, dedi Zelenskiy.
U, shuningdek, Rossiyadan Ukraina portlaridagi yuk kemalariga zarba berishni bas qilishni talab qilgan. BMT maʼlumotlariga ko‘ra, 1-sentyabrdan beri Rossiyaning Ukraina Qora dengiz portlariga bergan zarbalari oqibatida oltita fuqarolik kemasi va don yuklash infratuzilmasi zarar ko‘rgan.
Zelenskiyning ta’kidlashicha, “energetika va navigatsiya erkinligida natijaga erishish Rossiya urushni tugatishga tayyor bo‘lishi mumkinligidan dalolat beradi”.
Shu bilan birga, Zelenskiy Rossiya AQSHdagi prezidentlik saylovlari natijalarini kutishiga va shundan keyingina Kiyev bilan muzokara o‘tkazish yoki o‘tkazmaslikni hal qilishiga ishonadi.
Avvalroq Amerikaning The Washington Post (WP) nashri Rossiya va Ukraina Qatar vositachiligida energetika obyektlariga hujumlarni o‘zaro to‘xtatish bo‘yicha kelishuvni muhokama qilishni rejalashtirganini yozgan edi. Bo‘lajak uchrashuv ishtirokchilari bu muzokaralar oxir-oqibat urushni tugatish bo‘yicha keng qamrovli kelishuvga olib kelishi mumkinligiga umid bildirgan, biroq WP manbalariga ko‘ra, ular Ukraina Qurolli kuchlarining Kursk viloyatidagi hujumidan so‘ng to‘xtatilgan.
Izoh (0)