NATOning yangi bosh kotibi Mark Ryutte 3-oktyabr kuni Kiyevga e’lon qilinmagan tashrifi chog‘ida G‘arbning Ukrainani qo‘llab-quvvatlashini kuchaytirishga va’da berdi.
Ukraina prezidenti Vladimir Zelenskiy bilan bo‘lib o‘tgan qo‘shma brifing chog‘ida Ryutte yangi lavozimdagi ilk xorijiy tashrifini Kiyevga aynan Shimoliy Atlantika alyansi Ukraina tomonida ekanini barchaga tushuntirish uchun qilganini ta’kidladi.
Ryuttening fikricha, Ukrainaning erkinlik uchun kurashi NATOning asosiy tamoyillari va qadriyatlariga mos keladi.
“Ukraina endi NATOga har qachongidan ham yaqinroq va bizning ittifoqimizga a’zo bo‘lgunga qadar bu yo‘ldan borishda davom etadi”, dedi yangi bosh kotib.
Ukrainaning o‘zini himoya qilish huquqi, Ryuttening so‘zlariga ko‘ra, “chegara bilan yakunlanmaydi” va shuning uchun mamlakat Rossiya hududiga uzoq masofali G‘arb raketalarini otish imkoniyatiga ega bo‘lishi kerak.
“Rossiya noqonuniy urush olib bormoqda, demak, Rossiya qiruvchi va raketalarini Ukraina fuqarolik infratuzilmasiga qarshi ishlatishdan oldin nishonga olish hayotni saqlab qolishga yordam beradi”, deya ta’kidlagan u.
Ryutte, shuningdek, noyabr oyida AQSHda bo‘lib o‘tadigan prezidentlik saylovlarida kim g‘alaba qozonishidan qat’i nazar, mamlakat bilan hamkorlik qila olishiga ishontirgan.
Zelenskiy Ryutte bilan muzokaralar chog‘ida Ukrainaning “g‘alaba rejasi”, frontlardagi vaziyat va Ukraina armiyasining o‘ziga xos ehtiyojlari muhokama qilinganini ma’lum qilgan. U yana bir bor Ukrainaga G‘arbning ko‘proq qurollari, jumladan uzoq masofaga uchuvchi qurollari kerakligini aytgan.
“G‘arb yordamisiz Ukrainaga urushda g‘alaba qozonish imkoniyati yo‘q, bizga yetarli miqdorda va sifatli qurollar, jumladan, uzoq masofaga mo‘ljallangan qurollar kerak”, dedi Zelenskiy.
Ryutte Shimoliy Atlantika alyansining ustuvor vazifasi Ukrainaga yordam berishdan tashqari, NATO davlatlarining shaxsiy qurol-yarog‘ zaxiralarini to‘ldirish ekanligini qo‘shimcha qilgan.
Izoh (0)