АҚШ президенти Дональд Трамп томонидан Канада маҳсулотларига жорий этилган божхона тўловлари металлургия корхоналарида ишлайдиган 100 минг канадаликка жиддий таъсир кўрсатиши мумкин. Бу ҳақда Шимолий Америка пўлатчилар касаба уюшмасининг (United Steelworkers) Канададаги бўлими директори Марти Уоррен Reuters агентлигига маълум қилган.
Уорреннинг сўзларига кўра, божхона тўловлари аллақачон соҳада икки юзта ходимнинг ишдан бўшатилишига олиб келган.
“Ишини йўқотган ёки қисқартириш остига тушган ҳар бир шахс учун - бу жиддий зарба. 2 апрелда тўлиқ миқёсли божхона тўловлари жорий этилиши яна 100 мингта аъзомизга таъсир кўрсатиш эҳтимоли бор”, дейди Уоррен.
Касаба уюшмасига жами 225 мингдан ортиқ канадалик аъзо. Канада Америка бозорига пўлат етказиб берувчи энг йирик давлат ҳисобланади.
Март ойида АҚШ Мексика ва Канададан импорт қилинадиган маҳсулотларга 25 фоизлик божхона тўловларини, шунингдек, Хитой маҳсулотларига янги божхона тўловларини жорий қилди ва уларнинг ставкасини 20 фоизгача оширди. Америка расмий шахслари бу чораларни ноқонуний миграция ва гиёҳванд моддалар савдосига қарши кураш билан изоҳлади
Изоҳ (0)