Америкалик тадбиркор, медиа магнат, компьютер муҳандиси ва “Амазон” асосчиси Жефф Безос жорий йил ёзда уйланиши ҳақида маълум қилди. Бўлажак эр-хотин тўй маросими меҳмонларига расмий таклифнома юборган.
Хорижий ОАВ ларга кўра, никоҳ оқшоми Венецияда бўлиб ўтиши мумкин. Аввалроқ Жефф ва Лорен Италия соҳилидаги 500 миллион долларлик “Кору” яхтасида турмуш қуришлари ҳақида хабарлар тарқалган эди, бироқ бу маълумот ҳозирча тасдиқланмаган ва инкор ҳам қилинмаган.
Миллиардернинг бўлажак турмуш ўртоғи Лорен Санчес америкалик журналист, телебошловчи ва бизнесмен аёл. У Fox News ва “Гоод Дай ЛА” каби машҳур дастурларда бошловчилик қилган. Шунингдек, Лорен профессионал учувчи бўлиб, “Black Опс Aviation” деб номланган аэросъёмка компаниясига асос солган.
Фото: Marie Claire
Жефф Безос ва Лорен Санчес унаштирилганидан деярли 2 йил бўлди. 2023 йил май ойида 5 йиллик муносабатлардан Безос Санчесга турмуш қуришни таклиф қилган. Сўнг Лоренни 20 каратлик олмос билан безатилган йирик узук тақиб юргани папарат`силарга тушган. Ҳисоб-китобларга кўра, унаштирув узуги 2,5 миллион долларга тенг бўлиши мумкин.
2023 йил август ойида жуфтлик унаштирув маросими ўтказди. Тадбирга Билл Гейтс, Иордания қироличаси Рания, Крис Женнер, Салма Ҳаек, Миранда Керр ва бошқа машҳур шахслар ташриф буюрди. Байрам Позитанодаги яхтада бўлиб ўтди.
2023 йилнинг ноябрь ойида эса Лорен тўйга тайёргарлик ҳақидаги дастлабки тафсилотларни Vogue нашри билан ўртоқлашди:
“Биз ҳали ҳам тўй ҳақида, унинг қандай ўтказилиши ҳақида ўйлаяпмиз. Маросим катта бўладими? Чет элда бўладими? Ҳозирча бир қарорга кела олмадик”, деган эди у.
Маълумот учун, Жефф ва Лорен 2019 йилда учраша бошлаган. Ўша йили миллиардер собиқ рафиқаси Маккензи Скотт билан ажрашди. Улар 25 йил бирга яшаб, тўрт фарзанд –— уч ўғил ва асраб олинган бир қизни тарбиялаган.
Лорен Санчес эса 13 йиллик турмушдан кейин 2019 йилда собиқ эри Патрик Уайцелл билан ажрашди. Унинг икки нафар фарзанди — Патрикдан бир ўғил ва собиқ севгилиси Тони Гонсалесдан яна бир ўғли бор.
Изоҳ (0)