Ўзбекистон Бош консулхонаси кўмагида Бирлашган Араб Амирликларининг Дубай шаҳрида мушкул аҳволда қолган уч нафар аёл Ўзбекистонга қайтарилди, деб хабар қилмоқда “Дунё” ахборот агентлиги.
Бош консулхонадан олинган маълумотларга кўра, ўзбекистонлик И.Х., И.Г. ва унинг вояга етмаган фарзанди И.М. 2024 йил 22 декабрь куни яқин қариндошининг таклифи билан БААга келган ва Дубай шаҳрида ижара уйга жойлашган. Ўтган вақт мобайнида улар БААда бўлиш учун виза расмийлаштирмасдан ноқонуний яшаб келган.
Меҳмонларни БААга таклиф қилган шахс 23 февраль куни Қатарга чиқиб кетаётганини айтиб, алоқани узган. Март ойи бошида хонадон эгаси ижара пулини тўлаш кераклигини, агар ижара пули тўланмаса, хонадонни тарк этишни талаб қилиб, уларни кўчага ҳайдаган.
Ўзбекистонлик ушбу фуқаролар билан суҳбат давомида уларнинг турар уй-жой, озиқ-овқат ва ватанга қайтиш учун маблағлари йўқлиги маълум бўлган.
Бош консулхона ходимлари Амирликлардаги “Аёллар ва болаларга ёрдам кўрсатиш маркази” хайрия ташкилоти ва фаол ватандошлар билан биргаликда ёрдамга муҳтож фуқароларга барча зарур кўмак кўрсатди. Уларнинг БААда ноқонуний яшаб келган муддатда ҳисобланган 2 минг 178 АҚШ доллари миқдоридаги қарздорлик ушбу мамлакатнинг тегишли органлари билан олиб борилган музокаралар натижасида ижобий ҳал қилинган.
Uzbekistan Airways’нинг БААдаги ваколатхонаси эса фуқароларнинг Ўзбекистонга қайтиши учун Дубай—Тошкент қатновига ҳеч қандай тўловларсиз чипта расмийлаштириб берган.
Дубайда қийин аҳволда қолган фуқаролар
2025 йилнинг февралида Дубайда 247 минг доллар қарзга ботган ўзбекистонликка ёрдам берилганди. Фуқаро 2001 йилдан 2025 йилга қадар турли сабабларга кўра амирликлар ҳудудида ноқонуний яшаб келган. 2024 йилнинг февралида БААда касал бўлиб, қийин аҳволда қолган ўзбекистонлик фуқаронинг ватанга қайтишига ёрдам берилганди.2023 йилнинг августида Дубайда ноқонуний яшаб, 24 минг доллардан ортиқ қарзи бор Ўзбекистон фуқаросига ёрдам берилиб, ватанга қайтарилганди.
Изоҳ (0)