The Atlantic бош муҳаррири Жеффри Голдберг Дональд Трамп жамоасининг махфий гуруҳдаги ёзишмаларини кузатгани маълум бўлди. Signal деб номланган мессенжердаги чат ҳаволасини журналистга АҚШ президентининг миллий хавфсизлик бўйича маслаҳатчиси Майкл Уолтц юборган. Голдберг Оқ уй вакиллари у билан шахсан боғланмоқчи деб ўйлаб, гуруҳга қўшилган.
Журналистнинг маълум қилишича, ушбу гуруҳда Ямандаги ҳусийларига зарба бериш масаласи муҳокама қилинган. Унга кўра, чатда жами 18 нафар иштирокчи бўлган. АҚШ вице-президенти ЖД Венс, давлат котиби Марко Рубио, мудофаа вазири Пит Хегсет ва махсус вакил Стив Уиткофф кабилар шулар жумласидан.
Муҳокамалар давомида ЖД Венс ҳусийларга зарба масаласини сўроқ остига олган. “Ўйлашимча, биз хатога йўл қўйяпмиз”, деган у. АҚШ вице-президенти, шунингдек Европанинг 40 фоиз савдоси Сувайш канали орқали амалга оширилишини эслатиб, Америка жамоатчилиги Оқ уйнинг бу қарорини тушунмаслиги эҳтимолидан хавотир билдирган. Бундан ташқари, Трампнинг кўрсатмаси Европага доир жорий сиёсатга мос келмаслиги мумкинлигига шама қилган. Шу билан бирга, у “Европани яна қутқаришдан нафратланишини” қўшимча қилиб ўтган.
-nDpaJStB.avif)
SМ номли профил эса АҚШ президенти Яманга зарбалар учун “яшил чироқ” ёққанини, бироқ Сувайш канали бўйлаб кемалар қатновини тиклаш эвазига иқтисодий манфаат олиниши кераклигини таъкидлаган. Тахминларга кўра, у Трамп жамоасидаги маслаҳатчилардан бири Стивен Миллер бўлиши мумкин.
“Аммо биз тез орада Миср ва Европага бу ҳаракат эвазига нима кутаётганимизни аниқ баён қилишимиз керак. Шунингдек, бундай талабни қандай амалга оширишни ҳам ҳал қилишимиз зарур. Масалан, агар Европа харажатларимизни қопламаса нима бўлади? Агарда навигация эркинлигини катта маблағ сарфлаб тикласак, бунинг эвазига қандайдир иқтисодий фойда олишимиз керак”, деган у.
Голдбергнинг сўзларига кўра, мудофаа вазири Пит Хегсет Яманга уюштириладиган ҳужумларнинг батафсил режаси, нишонларнинг координаталари ҳамда қуроллар турини чатда ошкор қилган. Журналист буни аввалига “пранк” деб ўйлаган. Бироқ орадан кўп ўтмай, ҳусийларнинг позициялари чиндан ҳам нишонга олина бошлаган. Гуруҳ иштирокчилари эса бир-бирини муваффақият билан табриклаган.
Шундан сўнг Голдберг гуруҳни ўз ихтиёри билан тарк этиб, чатда бўлган барча амалдорларга расмий сўров юборган. АҚШ Миллий хавфсизлик кенгаши матбуот котиби Брайян Хьюз журналист назарда тутган махфий гуруҳ ҳақиқатда борлигини тасдиқлади.
Бироқ Пентагон раҳбари Пит Хегсет журналистнинг айбловларини рад этиб, “ҳеч ким ҳарбий режа ҳақида хабар юборганини” таъкидлади. У, шунингдек, Голдбергни “ёлғончи ва ишончсиз журналист” деб атаб, “ҳақиқатни доимий равишда бузиш орқали мартаба орттириш”да айблади.
Бу борада АҚШ президентидан ҳам изоҳ сўралди. Дональд Трамп журналистнинг чатга қўшилгани ҳақида ҳеч нарса билмаслигини айтиб: “Мен бу ҳақда ҳеч нарса билмайман. The Atlantic эса тез орада ёпиладиган журнал”, дея жавоб қайтарди.
Politico нашри мазкур можаро сабаб маслаҳатчи Майкл Уолтц ишдан бўшатилиши мумкинлигини маълум қилди.
“У кимлар ёзишмада иштирок этаётганини текширмасдан бепарволик қилди. Бундай муҳокамаларни Signal’да олиб бориш ўта лоқайдлик эди. Миллий хавфсизлик бўйича маслаҳатчи бундай хатоларга йўл қўймаслиги керак”, деган нашр манбаларидан бири.
Қайд этилишича, Трамп жамоасидан камида икки нафар амалдор Майкл Уолтц истеъфосига чиқиши зарур деб ҳисоблайди.
Изоҳ (0)