Air France авиакомпаниясининг Париждан Гваделупадаги Пуэнт-а-Питр шаҳрига учаётган самолёти йўловчи бортда телефонини йўқотиб қўйгани учун аэропортга қайтишга мажбур бўлди. Бу ҳақда Тhе Daily Mail хабар берди.
Самолёт бортида 375 нафар йўловчи ва 12 нафар экипаж бўлган. Учоқ эҳтиёт чораси сифатида ортга қайтишга қарор қилган. У ҳавода бор-йўғи икки соат бўлган. Ҳодиса 21 март куни юз бергани айтилмоқда.
FlightRadar24 маълумотларига кўра, лайнер Парижнинг Орли аэропортига қайтишдан олдин Франциянинг ғарбий қирғоқлари яқинида бир марта айланиб чиққан. Қўнгандан сўнг телефон топилган ва 20 дақиқа ўтгач самолёт Гваделупага қайта парвозга кўтарилган.
Январь ойида худди шу самолёт бортида йўловчи телефонини вентиляция тешигига тушириб юборган эди. Ёнғин хавфи сабабли самолёт аэропортга қайтишга мажбур бўлган. Бу воқеа Париждан Мартиника пойтахти Фор-де-Франсга учиши керак бўлган рейс билан содир бўлган.
Телефоннинг литийли батареяси шикастлангани ва ёнғин хавфи мавжудлигидан хавотирга тушган экипаж эҳтиёт чораси сифатида рейсни Парижга йўналтиришга қарор қилди, дея авиакомпания вакилллари ҳолатга изоҳ берди.
Аксарият рейслар электрон қурилмаларга нисбатан қатъий сиёсатга эга. Air France компаниясининг электроника сиёсатига кўра, ёнилғи элементлари бўлган портатив телефонлар фақат “самолёт кабинаси”га рухсат берилади ва агар улар 100 Вт заряддан ошмаса, уларни трюмга ҳам жойлаштириш мумкин.
Парвозлар давомида, айниқса, учиш ва қўниш пайтида, йўловчилардан қурилмаларни ўчириш ёки “парвоз режими”га ўтказиш талаб қилинади. Бу талаб АҚШ Федерал авиация маъмурияти (FAA) томонидан белгиланган, чунки уяли телефон сигналлари самолётнинг навигация ва алоқа тизимларига халақит бериши мумкин.
FAA’га кўра, 2006 йил мартидан 2025 йил февралигача парвозларда тутун, ёнғин ёки ҳаддан ташқари иссиқлик билан боғлиқ жами 86 та мобил телефон иштирокидаги ҳодиса содир бўлган.
АҚШда учувчи паспортини йўқотгани учун самолёт ортга қайтган эди. Самолёт бортида 257 нафар йўловчи ва 13 нафар экипаж аъзоси бўлган. Икки соатлик парвоздан сўнг самолёт Сан Францискога қайтган. Йўловчиларга овқатланиш ва компенсация учун ваучерлар берилган. Улар 6 соатли кечикиш билан бошқа рейсда Шанхайга учган эди.
Изоҳ (0)