Канаданинг янги бош вазири Марк Карни АҚШ билан савдо муносабатлари кескинлашаётган бир пайтда “ишончли иттифоқчилар”, жумладан, Франция билан алоқаларни мустаҳкамлаш ниятини билдирди.
Бундан олдин Карни АҚШнинг ўз мамлакатига нисбатан божхона тўловларини оширганини шарҳлаётиб, бу канадаликларга қарши ҳужум эканлигини таъкидлаганди. У шунингдек, Оттаванинг жавоб чоралари АҚШга максимал даражада таъсир қилиши, Канадага эса минимал даражада зарар етказишига ишонч ҳосил қилишини ваъда берганди.
“Бугун биз дунё бўйлаб тобора кўпроқ ҳукуматлар суверенитет ва хавфсизлик тамойилларини рад этаётганини кўраётган бир пайтда, Канада учун Франция сингари ишончли иттифоқчиларимиз билан алоқаларни мустаҳкамлаш ҳар қачонгидан ҳам муҳимроқ. Биз ўзимизнинг, иттифоқчиларимизнинг ва бутун дунёнинг хавфсизлигини таъминлаш учун мамлакатларимиз ўртасидаги ҳамкорликни кучайтиришимиз лозим”, деди Карни Франция раҳбари Эммануэл Макрон билан ўтказилган матбуот анжуманида.
Хусусан, Канаданинг янги бош вазири Франция билан дипломатик алоқаларни чуқурлаштириш, шунингдек иқтисодиётни ривожлантириш учун “тадбиркорлар учун кўпроқ имкониятлар яратиш” истагини билдирган.
Карни ўзининг биринчи хорижий ташрифи учун нега Парижни танлаганига изоҳ бераркан, “чунки канадаликлар Францияни яхши кўрадилар” деган. Шунингдек, у Канадани “Европага мансуб бўлмаган давлатлар орасида энг европача” деб таърифлаган.
Изоҳ (0)