Тошкент вилояти Тошкент туманида меъёрий талабларга жавоб бермайдиган яна бир объектнинг қурилиши тўхтатилди, деб хабар бермоқда Қурилиш ва уй-жой коммунал хўжалиги вазирлиги.
Вазирлик ҳузуридаги назорат инспекцияси КҲАЙ йўлида қурилаётган 9 қаватли уйда назорат тадбири ўтказганда объект лойиҳасига ўзгартиришлар киритилгани, хусусан, ички ғишт териш жараёнларида лойиҳа талабларига амал қилинмагани, айрим жойларда газоблок ўрнига ғишт ишлатилгани маълум бўлган. Таъкидланишича, бу бинонинг мустаҳкамлигига жиддий хавф туғдириб, ортиқча юклама юклайди.
Инспекция мутахассиси Ҳикматилла Саъдуллаевнинг сўзларига кўра, бу бино учун келгусида зилзилавий ҳолатларда салбий таъсир кўрсатиши маълум бўлди. Бундан ташқари, бинога ноқонуний тарзда қўшимча қават қўшилган. Яъни ҳужжатда қурилиш объекти 9 қаватли деб кўрсатилган бўлса-да, амалда унда 10-қават колонналари қурилгани аниқланган. Лойиҳага зид равишда бажарилиб, ноқонуний қўшилган қаватларни демонтаж қилиш ишлари бошланган.
Хабарда айтилишича, мазкур ҳолатлар юзасидан инспекция ходимлари томонидан объектдаги барча қурилиш ишлари жойида тўхтатилган. Лойиҳа талабларига зид равишда баражарилган ишларнинг барчасини буздириш бўйича ёзма кўрсатма берилди ва буздириш жараён бошланди.
Ўзбекистонда 2024 йилда 233,8 триллион сўмлик қурилиш ишлари бажарилган. 2025 йилда 120 минг хонадонли кўп қаватли уйлар қурилиши кутилмоқда.
Изоҳ (0)