Чиқиндихонадаги мотиватор, қурумсоқ ошиқ: кинокастинглардан ўта олмаган Бобур Мансуров қандай қилиб машҳур вайнерга айланди?

Кўпчилик Бобур Мансуровни шунчаки вайнер деб билади. Аммо у профессионал актёр. Шунчаки кинодаги уринишлари муваффақиятсиз бўлган ва вайнер бўлгунигача арзирли бирорта ролни ижро этмаган. Бобур Мансуровнинг туғилган куни муносабати билан қуйида унинг муваффақиятга эришиш йўли ҳақида ҳикоя қиламиз.   

“Онам 50 ёшида талаба бўлди”

Бобур Мансуров болалигидан санъатга қизиққан. Аммо оиладаги шароит сабаб санъат тўгаракларига қатнашишга имкони бўлмаган. У яшайдиган қишлоқ Тожикистон билан чегарадош ҳудудда бўлган. Бу ерлик аҳоли чорвачилик ва деҳқончилик билан шуғулланган. Бўлажак актёр ҳам бошқа болалар сингари болаликдан рўзғорга кўмаклашган.

— Сирдарё вилоятида оддий ишчилар оиласида дунёга келганман. Онам асли ўшлик, дадам эса сирдарёлик бўлган. Оиламизда қиз йўқ, беш ўғилмиз. Шу боисдан ҳам болалигимиздан меҳнат қилишга ўрганганмиз. Дадам кабобпаз бўлса-да, барчамизни олий маълумотли қилган. Онам ҳам ўқишни орзу қиларди. Ҳаммамиз олий маълумотли бўлганимиздан кейин ўзи ҳам институтга ҳужжат топшириб, 50 ёшида талаба бўлди, дейди Бобур Мансуров.

“Ота касбим кабобпазлик”

Бобур Мансуровнинг дадаси чойхонада кабобпаз бўлиб ишлаган. Бўлажак актёр дарсдан кейин дадасининг иш жойига бориб, унга кўмаклашган.

 — Кабоб пишириш, унинг туз-намагини тўғрилаш қўлимдан келади. Чунки анча вақт дадам билан бирга чойхонада ишлаганман, дейди Бобур Мансуров.

“Хонанда бўлиш орзум амалга ошмаган”

Актёр болаликдан қўшиқчи бўлишни орзу қилган. Аммо Сирдарёдаги санъат коллежида хонандалик бўлими бўлмагани учун драма актёрлиги бўлимида ўқишга мажбур бўлган. Ўқиш давомида актёрликка меҳри ортиб, катта орзу-умидлар билан Ўзбекистон давлат санъат ва маданият институтига ҳужжат топширган.

— Ижодий имтиҳондан кейин барча орзу-умидларим чилпарчин бўлган. Чунки мен ўз маҳоратимга ишонардим. Аммо икки йилги имтиҳонда ҳам энг паст баллни ўзим олганман. Биринчи йил ижодий имтиҳондан 13, кейинги йил эса 8 балл олганман. Бу умуман истеъдодсиз актёрсан, дегандек гап эди, дейди Бобур Мансуров.

“Санъатдан кўнглим қолганди”

Кетма-кет имтиҳонлардан йиқилган Бобур Мансуров ўзини тадбиркорлик соҳасида синаб кўрмоқчи бўлади. Қишлоқ марказида Paynet шохобчасини очади. Аммо кўп ўтмай шохобча банкротга учрайди. Яқинлари унга ҳарбий хизматга боришни тавсия қилишади.

— Санъатдан бутунлай кўнглим қолган. Қўлимдан ҳеч нарса келмайди, истеъдодсизман, деб тушкунликка тушгандим. Устига устак, биринчи йил ҳарбий хизматга қабул қилишмади: қон босимим борлиги халал берди. Келаси йил эса бир йиллик хизматга қабул қилиниб, Фарғонага йўл олдим, дейди Бобур Мансуров.

“Ижодий имтиҳондан паст балл олганман”

Санъатга ошуфта кўнгил ҳар қандай шароитда ҳам ижод қилишга имкон топади. Бобур Мансуровнинг санъатга қизиқишини билган командирлар уни ҳарбий қисмлар ўтказадиган танловларда иштирок этишини сўрашади. Муваффақиятли иштирокидан сўнг, жамоа билан бирга ҳарбийлар ўртасидаги ҚВЗда иштирок этишни таклиф қилишади. Командирлар “Агар ғолиб бўлсанг, имтиёз олишинг мумкин”, дейишади. Институтга кириш иштиёқи сўнмаган Бобур Мансуров жамоаси билан астойдил меҳнат қилиб, иккинчи ўринни қўлга киритади.

— Ҳарбий хизматни имтиёз билан якунлаганман. Акам Жаҳон тиллари университетига ҳужжат топширишимни сўраган. Чунки оила аъзоларим ҳам санъаткор бўлишимдан умидларини узган эди. Акамдан яширинча санъат институтига ҳужжат топширганман. Аммо ижодий имтиҳондан паст балл олганман. Имтиёз сабаб шартнома асосида ўқишга қабул қилинганман, дейди Бобур Мансуров.

“Шунчалик хунукманми, нега ролга олишмайди?”

Актёр Ўзбекистонда хизмат кўрсатган маданият ходими Мунаввара Абдуллаева қўлида таҳсил олади. У истеъдодли эканлигини исботлаш учун дарсларда фаол бўлишга ва кастингларда иштирок этишга ҳаракат қилади. Ажабланарлиси шундаки, Бобур Мансуров 8 йил давомида бирорта кастингдан ўтмайди.

 — Ҳамма курсдошларим кастинглардан ўтишарди. Аммо мен бирор марта эпизод бўлса-да, ролга қабул қилинмаганман. Кўринишим ёқмайдими, шунчалик хунукманми, деб ўз-ўзимга савол берардим. Ҳатто бир сериалнинг кастингидан барча курсдошларим ўтган, мен эса ўтолмаганман. Бир томондан курсдошларимнинг ютуғидан қувондим, бошқа томондан эса ичимда ғалати ғалаён бўлган, дейди Бобур Мансуров.

“Ҳақ олмай, телеканалда ишлаганман”

Бирорта ролга тасдиқланмаган ижодкор хусусий телеканалларнинг бирига иккинчи режиссёр сифатида ишга киради. Аммо у тўрт ой ишлаб, умуман ҳақ олмайди. Лекин тажриба орттириб, кейинчалик ўзи сериалга мустақил режиссёрлик қилади.

— Бир муддат ҳақ олмай, телеканалда ишлаганман. Кейин “Орзулар палатаси” номли сериалга режиссёрлик қилганман. Давлат бюджети асосида суратга олинган сериал — илк мустақил ишим бўлган. Шунинг учун ҳам камчиликлари етарлича, дейди Бобур Мансуров.

“Россияга ишлагани кетмоқчи бўлгандим”

Бобур Мансуров молиявий қийинчиликларга кўп учраган ижодкор ҳисобланади. Шунинг учун ҳам вайнер бўлишдан аввал ўзини бутунлай бошқа соҳаларда ҳам синаб кўрган.

— Пулдан етишмовчилик ҳамиша бўлган. Мусофирчиликда таҳсил олган талабалар буни жуда яхши билишади. Уйдагилардан пул сўрашга уялиб, официантлик қилганман. Аммо қийинчиликнинг энг зўри институтни битиргандан кейин бўлган. Санъаткорларнинг ойлиги жуда кам, “съёмка”ларга умуман чақиришмайди. Аммо яшашингиз учун ҳамиша пул керак. Санъатда келажагимни кўрмаганимдан кейин Россияга ишлагани кетмоқчи бўлганман. Фалон кунга самолёт бор экан, деб ҳужжатларни тахт қилиб турганимда курсдошларим вайнерлик қилиш таклифини беришган, дейди Бобур Мансуров.

“Видеоларим ўзимга ёқмаган”

Бир қарашда вайнерлик осон кўринса-да, профессионал актёрларнинг кўпи бу ишни ўзига эп кўришмайди. Бобур Мансуров ҳам тўрт йил вайнер бўлиш учун институтда ўқидингми, деган гаплардан қўрқиб, олти ойгача видеоларни оммага чиқармаган.

— Иккиланганмиз, видеолар шахсан менга умуман ёқмаган. Шу боис бир неча ой уларни оммага чиқармаганмиз. Ибрат исмли курсдошим сабаб бўлиб илк видеоларимиз Instagram’га жойланган, дейди Бобур Мансуров.

“Чиқиндихона ҳам машҳур бўлиб кетди”

Бобур Мансуров оддий одамлар ҳақида ҳазил видеолар суратга олиши билан бошқа вайнерлардан фарқ қилади. Чиқиндихонадаги мотиватор, қурумсоқ ошиқ ҳақидаги видеолар шулар жумласидан.

— Воқеаларнинг кўпи мен ёки дўстларимнинг ҳаётида содир бўлган. Ҳатто чиқиндихонадаги мотиватор воқеасига дуч келганимдан кейин шу ҳақда видео олишга қарор қилганмиз. Маҳалламиздаги чиқиндихона жуда машҳур бўлиб кетди, шундай кунлар ҳам келдики, у ерда видео олишимизга рухсат беришмади, дейди Бобур Мансуров.

Санъаткор қизга уйланди

2023 йил Бобур Мансуров оила қурди. У ўзидан саккиз ёш кичик Фариза Орипова исмли қиз билан оила қурди.

— Аёлим билан мусиқа фестивалида учрашиб қолганмиз. У оддий томошабин бўлиб келган. Кўнгил кўнгилга тўғри келиб оила қурдик, дейди Бобур Мансуров.

Фариза Орипова ҳам санъатга бегона эмас, у Ўзбекистон давлат консерваториясида таҳсил олади, ширали овози бор. У Instagram тармоғида кузатувчиларнинг нега вайнер билан оила қургани ҳақидаги саволларига қуйидагича жавоб берганди.

— Турмуш ўртоғимдек оқкўнгил, самимий, содда инсон санъат соҳасида кам учрайди. Умуман кибрга берилмаган, ҳар қандай ҳолатда бир хил. Ҳурмат қиладиган ва ўрганишим керак бўлган хислатлари жуда кўп. Аллоҳнинг синовларига шукр қилган, иймонли инсонлар. Гапирсам гап кўп. Шунинг учун кўнгил қўйганман.

Ёшимиз орасидаги фарқ — 8 йил. Аввало тақдир. Бир-биримизга кўнгил қўйдик. Дунёқарашларимиз тўғри келди. Кейин ота-онамизнинг дуоси ва розиликлари билан турмуш қурдик. Кўпчилик ижтимоий тармоқларда бир-бирига мос эмас, унга бошқа қиз мос эди, деб ёзганига кўзим тушди. Лекин шуни билингки, ким кимнинг ҳалол жуфти бўлиши керак эканини, бир-бирига тўғри келиш-келмаслигини фақат Яратган эгам ва кейин ўзимиз биламиз, деб ёзганди Фариза Орипова.

Бобур Мансуровнинг реклама нархи қанча?

Бу савол кўпчиликни қизиқтириши аниқ. Тан олиш керак, Бобур Мансуров ҳозирда талабгор вайнерлардан бирига айланиб улгурган. Instagram’да актёрнинг реклама нархлари: сториэс — 1500, пост — 5000 АҚШ доллари этиб баҳоланган.

Кети узилмаётган рекламалар сабаб актёр пойтахт марказидан уй сотиб олди, машинасининг маркаси ҳам ҳавас қилгудек.