Франция президенти Эммануэл Макрон Европа иттифоқининг Брюсселдаги саммитининг биринчи кунидан сўнг 27-март куни Парижда бир неча давлат раҳбарлари учрашиб, Украина атрофидаги вазиятни муҳокама қилишини маълум қилди.
“Биз Украина армиясини қисқа муддатли қўллаб-қувватлаш ва Россия босқинларининг олдини олиш учун Украина армиясининг барқарор ҳамда мустаҳкам моделини ҳимоя қилиш бўйича ишимизни якунлаймиз”, деди Франция президенти.
Унинг қўшимча қилишича, 27-март куни Украинани қисқа муддатли қўллаб-қувватлаш бўйича янада аниқроқ келишувларга эришиш мақсад қилинган.
“Келаси ҳафта биз Парижда Украинага ёрдам беришга тайёр давлатлар коалициясининг саммитини ўтказамиз”, деди Макрон.
Унинг таъкидлашича, саммитда Украина президенти Владимир Зеленский ҳам иштирок этади.
Bloomberg маълумотларига кўра, Германия, Франция ва Польша каби Европа иттифоқининг етакчи давлатлари, шунингдек, Канада ва Буюк Британия (аъзо бўлмаган давлатлар) келгуси ҳафта Парижда янги саммит ўтказади. Ушбу давлатлар 20 март куни Брюсселдаги саммитда бошланган муҳокамаларни давом эттиради.
Кун тартибида АҚШ ва Россия ўртасидаги Украина бўйича музокараларга таъсир ўтказиш имкониятлари ва энг самарали тарзда уларда иштирок этиш йўлларини кўриб чиқиш масалалари бор.
Изоҳ (0)