Президент Владимир Путин Америка раҳбари Дональд Трамп билан телефон орқали суҳбат ўтказди. Мулоқот икки соатдан ортиқ давом этган. Бу ҳақда Россия президенти Владимир Путин суҳбатдан сўнг журналистлар билан учрашувида маълум қилди.
Путиннинг айтишича, у Трампга Қўшма Штатларнинг Россия ва Украина ўртасидаги тўғридан-тўғри музокараларни қайта бошлашдаги иштироки учун миннатдорлик билдирган. Шунингдек, америкалик ҳамкасби билан суҳбат “жуда фойдали” бўлгани қайд этган.
“Таъкидлашни истардимки, суҳбат жуда мазмунли ва очиқ-ойдин бўлди”, дейди Путин.
Россия президенти жанглар тўхтатилиши кераклигини, бироқ тинчликка эришишнинг энг самарали йўлларини ишлаб чиқиш зарурлигини таъкидлади. Унинг сўзларига кўра, Россия Федерацияси Украина билан ўт очишни тўхтатишни ўз ичига олган меморандум устида ишлашга тайёр. Россия ва Украина барча томонларни қониқтирадиган келишув йўлларини топиши лозим.
Шунингдек, Россия раҳбари Россия ва Украина тўғридан-тўғри музокаралар қайта бошланганидан сўнг “умуман олганда тўғри йўлдан кетаётганини” таъкидлади.
Трамп Украинадаги жанговар ҳаракатларни тўхтатиш бўйича ўз нуқтаи назарини билдирган.
“Ўз навбатида, Россия ҳам Украина инқирозини тинч йўл билан ҳал қилиш тарафдори эканини таъкидладим. Биз бунга эришишнинг энг самарали йўлларини аниқлашимиз керак”, дея қўшимча қилди Путин.
“Россия Украина томони билан келажакдаги эҳтимолий тинчлик шартномаси бўйича меморандум устида ишлашни таклиф этади ва бунга тайёр. Унда бир қатор масалалар, жумладан, низони ҳал қилиш тамойиллари, тинчлик битими тузиш муддатлари ва бошқалар белгиланади. Шунингдек, тегишли келишувларга эришилган тақдирда маълум вақтга ўт очишни тўхтатиш ҳам кўриб чиқилиши мумкин. Энг муҳими, бу инқирознинг асл сабабларини бартараф этишдир”, дейди Россия президенти.
Путиннинг айтишича, матбуот котиби Дмитрий Песков ёки президент ёрдамчиси Юрий Ушаков Трамп билан бўлиб ўтган суҳбат тафсилотларини кейинроқ тушунтириб беради.
Истанбул музокаралари
10 май куни Украина президенти Владимир Зеленский Киевда Европанинг тўрт давлати раҳбарларини қабул қилди. Саммит якунида улар қўшма баёнот қабул қилиб, унда Россиядан камида 30 кун давомида сўзсиз ўт очишни тўхтатишни талаб қилди ва янги санкциялар билан таҳдид солди.
Орадан бир неча соат ўтиб, 11 майга ўтар кечаси Россия президенти Владимир Путин Кремлда журналистларни тўплаб, Истанбулда 2022 йил баҳорида тўхтаб қолган музокаралар 15 майдан бир томонлама тартибда қайта тикланишини эълон қилди.
Шундан сўнг Зеленский Туркияга келишини, лекин фақат Путин билан музокара олиб боришини айтди. Кремль 14 майга ўтар кечаси Россия делегацияси таркибини эълон қилди. Унга Мединский бошчилик қилди.
Россия делегацияси 15 май куни эрталаб Истанбулга учиб келди. Шу куни тушдан кейин Владимир Зеленский Украина расмийлари билан бирга Туркия раҳбари Ражаб Тоййиб Эрдўғон билан музокаралар ўтказиш учун Анқарага учиб келди. Уч соатга яқин давом этган учрашувдан сўнг Зеленский Умеров бошчилигидаги Украина делегациясини музокараларда иштирок этиш учун Истанбулга юборишга розилигини билдирди.
Истанбулда 16 май куни Россия ва Украина делегациялари ўртасида 2022 йил баҳоридан бери биринчи музокаралар ўтказилди. Томонлар ўт очишни тўхтатиш бўйича келишувга эриша олмади, аммо энг йирик асирлар алмашинувини амалга оширишга келишиб олди.
Изоҳ (0)