Россия қўшинлари Финляндия билан чегара яқинидаги базаларни мустаҳкамламоқда ва ҳарбий инфратузилма қурмоқда. Бу ҳақда сунъий йўлдош тасвирларига таяниб, The New York Times хабар берди.
Финляндия билан чегара яқинида ҳарбий инфратузилма: чодирлар, қирувчи самолётлар учун ангарлар ва ҳарбий техника омборлари қурилмоқда. Илгари деярли ташлаб қўйилган вертолёт базасида мунтазам қурилиш ишлари олиб борилмоқда.
НАТО давлатига ҳужум қилиш Украинадаги уруш натижасига боғлиқ бўлади, дейди разведка вакиллари.
Бу ҳаракатлар ҳозирча узоқ муддатли ва кенг қамровли режага киришишнинг бошланиши бўлиб кўринмоқда. НАТО расмийларига кўра, бу ҳолат 2022 йилда Россия Украинага бостириб киришидан олдин Украина чегараси яқинида олиб борилган ҳарбий тўпланишларга ўхшамайди.
Ҳозирча Россиянинг эътибори Украинадаги урушга қаратилган, шу боис чегарада унча кўп ҳарбий куч йўқ. Финляндияликлар ҳам ҳозирча бу ҳолатни катта хавф сифатида кўрмаяпти, дейилади хабарда.
Яқинда Финляндия чегарасидан 160 километрдан камроқ масофада Арктикадаги базада Россия Қуролли кучларининг ўнлаб самолётлари аниқланганди. Тахминан бир йил олдин Финляндиядан 65 километр узоқликдаги Каменка шаҳрида юздан ортиқ янги чодирлар пайдо бўлган. Бундан ташқари, Эстониядан тахминан 130 километр узоқликдаги базада янги чодирлар ва ҳарбий техникалар кузатилган.
Россияликлар бригадаларни дивизияларгача кенгайтирмоқда. Чегараларимиз яқинидаги бўлинмалар сони мингга ошади, деди финляндиялик таҳлилчи Эмил Кастелми.
Экспертнинг баҳолашича, яқин бир неча йил ичида Финляндия чегарасидаги вазиятда жиддий ўзгаришлар юз беради. Бунда Украинадаги урушнинг тугаши натижаси ва муддати катта аҳамиятга эга.
Изоҳ (0)