Россиядаги колониядан туннел қазиб қочган 5 нафар ўзбекистонликка ҳукм ўқилди

Россиянинг Липецк шаҳридаги колониядан 2024 йил ёзида туннел қазиб қочиб кетган 6 нафар маҳбусга суд ҳукми ўқилди. Уларнинг беш нафари Ўзбекистон фуқароси бўлган. Бу ҳақда Воронеж вилояти прокуратураси матбуот хизмати хабар берди.

Маҳбуслар Россия Жиноят кодексининг 313-моддаси (бир гуруҳ шахслар томонидан озодликдан маҳрум этиш жойидан қочиш) бўйича айбдор деб топилган. Улар 4,5 йилдан 12,5 йилгача озодликдан маҳрум этилган. Липецк шаҳридаги 2-сонли колонияда жазо ўтаётган маҳкумлар 2 ой давомида металл лист, металл қувур бўлаги, белкурак ва кесувчи диск ёрдамида туннел қазиган.

Тунда улар колония ҳудудидан чиқиб, Тамбов ва Москва томон бир неча ўн километр масофани босиб ўтган. Эртаси куни беш нафар маҳбус қўлга олинган. Олтинчиси деярли икки ҳафта яширинишга муваффақ бўлган.

30 метрдан узун бўлган ерости йўли колониянинг ҳимоя панжараси остидан ўтган. 2024 йил 25 октябрь куни беш нафар Ўзбекистон фуқароси ва бир нафар Тожикистон фуқароси бўлган маҳбуслар айнан шу йўл орқали қочиб кетган. Тўрт нафар маҳкум жазони қаттиқ тартибли колонияда, икки нафари умумий тартибли колонияда ўтайди.

Колониядан қочган маҳбуслар қандай жазо ўтаётган эди?

Марказий Осиё фуқаролари педофилия, гиёҳванд моддалар ва босқинчилик учун қамалган. “Лента.ру” маълумотларга кўра, қочқинлар рўйхати қуйидагича:

• Парвозбек Тўрабоев 19 ёшда, Ўзбекистон фуқароси, Россия Жиноят кодексининг 228.1-моддаси (гиёҳванд моддалар) бўйича 4 йилга озодликдан маҳрум этилган;
• Хуршидбек Ғаниев 19 ёшда, Ўзбекистон фуқароси, рўйхатдан ўтган жойи тўғрисидаги устунда “бомж” деб кўрсатилган, Россия Жиноят кодексининг 228.1-моддаси (гиёҳванд моддалар) бўйича 6 йилга озодликдан маҳрум этилган;
• Дилшод Арслонов 28 ёш, Ўзбекистон фуқароси, 12 ёшдан 14 ёшгача бўлган болани зўрлаганликда айбланиб судланган;
• Турғун Абдуллаев 28 ёш, Ўзбекистон фуқароси, номусга тегишда айбланиб, 12 йилга озодликдан маҳрум этилган;
• Бахтиёр Жумаев 28 ёш, Ўзбекистон фуқароси, номусга тегиш айби билан 7,5 йилга озодликдан маҳрум этилган;
• Даврон Жабборов 27 ёш, Тожикистон фуқароси, 2022 йилда зўрлаш ва босқинчиликда айбланиб, 6 йилга озодликдан маҳрум этилган.