АҚШ президенти Дональд Трамп Россия ва Украина вакиллари ўртасида учрашувлар бўлиб ўтиши мумкин бўлган Истанбулга ташриф буюриш имкониятини кўриб чиқаётганини маълум қилди. Бу ҳақда у Оқ уйдаги журналистлар билан ўтказилган брифингда маълум қилди.
“Мен Россия ва Украинанинг Истанбулдаги учрашуви ўтказилишини талаб қилдим ва у албатта бўлиб ўтади. Бу жуда муҳим. Менимча, пайшанба куни Туркияда Россия ва Украина ўртасида бўлиб ўтадиган учрашув натижалари ижобий бўлади. Бу қонга ботган даҳшатли урушни тўхтатиш керак. Бу — қонли жанггоҳ. Ҳар ҳафта 5 000 дан ортиқ одам ҳалок бўлмоқда.
Бу рақамлар тахминий, аслида ундан ҳам кўп. Булар ичида америкаликлар йўқ. Бу россияликлар, украиналиклар, оддий инсонлар. Улар Иккинчи жаҳон урушидан бери кўрилмаган миқёсда қирилмоқда. Ҳар ҳафта. Бу жанглар асосан дронлар ёрдамида бўлмоқда — урушнинг янги, шафқатсиз ва ваҳший шакли.
Мен, очиғи, пайшанба куни ўша ерга учиб боришни ҳам ўйладим. Лекин ўша куни қаерда бўлишимни билмайман — Яқин Шарқда жуда кўп учрашувларим бор. Агар бу фойдали бўлишига ишонч ҳосил қилсам, албатта учаман. Чунки биз ҳар ҳафта 5 минг ҳаётни сақлаб қолишимиз мумкин, балки, ундан ҳам кўпроқ. Ҳолат бундан баттарроқ”, деди АҚШ президенти Дональд Трамп.
Россия президенти Владимир Путин 15 май куни Истанбулда Украина билан тўғридан тўғри музокараларни бошлашни таклиф қилганди. Украина президенти Владимир Зеленский мазкур музокараларда Путинни шахсан кутишини айтди.
Изоҳ (0)