Олимлар яқинда кашф қилинган 2025 KF номли астероид 21 май куни тунда Ерга яқинлашишини маълум қилди. Бу ҳақда Space хабар берди.
19 май куни астрономлар 2025 KF номли янги астероидни аниқлаган. Унинг ўлчами 10-25 метрга баҳоланмоқда. Таққослаш учун, 9 қаватли бинонинг баландлиги тахминан 25 метрни ташкил қилади.
Олимларнинг ҳисоб-китобларига кўра, янги астероид 41 минг км/соатдан ортиқ тезликда учади. У 21 май куни Тошкент вақти билан соат 22:30 да Ердан тахминан 115 минг километр масофада учиб ўтади. Бу Ой ва Ер ўртасидаги масофанинг тахминан учдан бир қисмига тенг. Аммо космик ўлчовлар бўйича бу яқин ҳисобланади.
2025 KF астероиди Ерга тушмаслиги сабабли потенциал хавфли ҳисобланмайди. У Ойга ҳам урилмаслиги ва Ернинг табиий йўлдошидан 226 000 километрдан ортиқ масофада ўтиб кетиши кутилмоқда.
Мазкур астероид Ерга тушган тақдирда ҳам, кичик ўлчамдалиги сабабли атмосферада ёниб кетган бўларди. Натижада, одамлар ва инфратузилмага ҳеч қандай зарар етмасди.
1998 йилдан бошлаб НАСА потенциал хавфли Ер атрофидаги астероидларни кузата бошлади ва ўшандан бери тахминан 40 000 та космик тошлар топилди. Ҳар йили Ерга яқин масофадан бир неча метр, баъзан ундан ҳам каттароқ бўлган ўнлаб астероидлар учиб ўтади.
Аммо астероидлар Ернинг тортишиш кучи таъсирида, шунингдек, коинотдаги бошқа тошлар билан тўқнашув натижасида ўз траекториясини ўзгартириши мумкин. Шу сабабли, олимлар доимий равишда Ерга яқин астероидларни кузатишда давом этмоқда.
Шуни таъкидлаш лозимки, 2025 KF астероидининг Ерга яқинлашиши, ҳозирга қадар маълум бўлган космик тошларнинг энг яқин учиш рекордини янгилай олмайди. 2020 йилда 2020 QG астероиди Ердан атиги 2950 километр масофада учиб ўтган эди. Бундай масофада Ер атрофида айрим сунъий йўлдошлар айланиб туради.
Изоҳ (0)