33 ёшли Оскар Женкинс 16 май куни Украина шарқидаги қуролли можарода ёлланма аскар сифатида қатнашгани учун Россия томонидан судланиб, 13 йилга қамоққа олинди. Бу ҳақда рус прокурорларига таяниб BBC хабар берди.
Мелбурнлик ўқитувчи Оскар Женкинс 2024 йилнинг декабрь ойида Луганск вилоятида қўлга олинган. Прокурорларнинг таъкидлашича, у Украинага 2024 йил февраль ойида келган. Унга Россия қўшинларига қарши ҳарбий операцияларда қатнашиш учун ойига 600 мингдан 800 минг рублгача пул тўланган.
2025 йил январь ойида Австралия Женкинс қўлга олинганидан кейин ўлдирилгани ҳақидаги ёлғон хабарлар туфайли Россия элчисини чақиртирган ва бир неча бор уни озод қилишни сўраган.
“Биз жаноб Женкинснинг ишини Россия президенти Владимир Путиннинг қораланган ҳукуматига тақдим этишда давом этамиз”, деди Австралия бош вазири Энтони Альбанесе апрель ойида.
2025 йил март ойида британиялик Жеймс Скотт Рис Андерсон терроризм ва ёлланма фаолиятда айбланиб, Россия ҳарбий суди томонидан 19 йилга қамалган ва уруш пайтида Россия томонидан судланган биринчи британиялик бўлган эди.
Изоҳ (0)