Тошкент шаҳрида лаваш ва картошка фри едирилгани учун ичаги чириган 10 ойлик чақалоқ операция қилинди. Бу ҳақда “Миллар” дастурида хабар берилди.
Қайд этилишича, олис вилоятдан Тошкент шаҳрига келаётган она йўлдан тушлик учун лаваш ва қовурилган картошка сотиб олган. Йиғлаб, хархаша қилгани учун аёл ўзига олган фастфудни оғзида чайнаб, 10 ойлик чақалоғига ҳам едирган. Орадан маълум вақт ўтиб, гўдакнинг аҳволи оғирлашган.
Шифокорнинг билдиришича, чақалоқда кўп маротаба қайт қилиш, ичидан қон кетиш, қорни дам бўлиши ва доимий оғриқлар кузатилиб келган. Ичак чириши сабабли эндиликда бир нечта операция бажарилиши керак. Биринчи босқичда ичакнинг чириган қисми олиб ташланган ва ичак стомаси чиқариб қўйилган. Бу стома билан чақалоқ 6 ойча яшаб туради, кейин яна операция қилинади ва ичак тикланади.
Хабарда айтилишича, Республика шошилинч тиббий ёрдам илмий маркази Болалар жарроҳлиги бўлимига болалар ичаги ишдан чиқиши билан боғлиқ мурожаатлар тез-тез келиб тушади. Айримлар билмаган ҳолатда чақалоқларга думба ёки кўк сомса бериб қўйиши ҳолатлари ҳам кузатилган. Шундай ҳолатлар аянчли оқибатларга олиб келади.
Аслида 3 ёшгача бўлган болаларни она сути билан озиқлантириш лозим. 1 ёшдан ўтгандан кейин эса қўшимча озуқа бериш мумкин.
Изоҳ (0)