Европа Иттифоқи (ЕИ) 20 май куни Temu ва Shein каби онлайн савдо платформаларидан келадиган кичик жўнатмалар учун 2 евро солиқ жорий этиш режасини эълон қилди. Бу ҳақда BBC хабар берди.
Бу чоралар ЕИ бозорига арзон, лекин сифат ва хавфсизлик талабларига жавоб бермайдиган маҳсулотларнинг кириб келишини чеклашга қаратилган. Агар маҳсулот ЕИ ичидаги омборларга юборилса, тўлов 0,50 евро бўлади. Тўғридан тўғри мижоз уйига жўнатилса, 2 евро тўланади. Солиқ 150 евродан кам бўлган қийматдаги жўнатмаларни қамраб олади. 2024 йилда ЕИга келган 4,6 миллиард кичик жўнатманинг 91 фоизи Хитойдан, асосан, Shein ва Temu каби платформалардан юборилган.
Shein ва Temu учун таъсири
Shein ва Temu каби платформалар арзон нархлари билан машҳур бўлиб, ЕИ бозорида катта улушга эга. Янги солиқ уларнинг бизнес моделига бевосита таъсир қилади, чунки бу платформалар кўпинча тўғридан тўғри истеъмолчиларга юбориш орқали божхона тўловларидан қочади.
Ҳозирда ЕИ бўйича 27 та аъзо давлат томонидан тасдиқланиши керак бўлган бу таклиф ҳали расмий равишда қабул қилинмаган. Агар тасдиқланса, янги солиқ 2026 йилдан кучга кириши кутилмоқда.
Ўзбекистон истеъмолчилари учун қандай таъсир қилади?
Агар сиз ЕИ давлатларида бўлиб, буюртма қилсангиз, янги солиқ тўловлари қўлланиши мумкин. Шу сабабли буюртма қилишдан олдин жўнатма нархи ва қўшимча тўловларни ҳисобга олиш муҳим.
Изоҳ (0)