Исроил разведкаси 13 июнь куни Эроннинг ядро объектларини нишонга олиш ва амалдорларини ўлдиришдан олдин эронлик генералларга таҳдид қилгани аниқланди. Бу ҳақда таҳдидли аудиога таяниб, Washington Post хабар берди.
Исроил разведкасида ишловчи, форс тилида сўзлашувчи одамлар Эроннинг юқори мартабали амалдорларига уяли телефон орқали қўнғироқ қилган.
Улар амалдорларни Эрон олий раҳнамоси оятуллоҳ Али Хоманаий режимини қўллаб-қувватлашни тўхтатмаса, ўлишлари ҳақида огоҳлантирган, дейди махфий операцияларни муҳокама қилиш учун анонимлик шарти билан гапирган уч киши.
Яҳудий разведкаси ҳокимиятдаги 20 дан ортиқ эронликка қўнғироқ қилгани айтилмоқда. The Washington Post нашри шундай қўнғироқлардан бирининг аудиоёзувини қўлга киритган. Унда номаълум разведка ходими эронлик генерални уни ва оиласини ўлдириш билан таҳдид қилган.
Сизга ҳозир маслаҳат беришим мумкин: хотинингиз ва фарзандингиз билан қочиб кетиш учун 12 соат вақтингиз бор. Акс ҳолда, ҳозироқ бизнинг рўйхатимизга тушасиз, кейинги нишонимиз бўласиз. Сизни, оилангизни, болаларингизни, ҳаммани тупроқ билан кўмиб ташлаймиз. Биз сизга бўйин томирингиздан ҳам яқинроқмиз. Буни миянгизга қуйинг, деган овози ўзгартирилган разведка ходими.
Ҳали ҳам тирик деб тахмин қилинаётган эронлик мазкур генералнинг кимлиги ошкор қилинмаган. Қўнғироқ пайтида унинг овози ўчириб қўйилган.
Суҳбат бошида қўнғироқ қилган шахс ўзини “Саламий, Боғэрий ва Шамхонийни дўзахга жўнатган давлатданман” деб таништирган. Бу сўзлар орқали у Исроил томонидан ҳарбий кампания бошланишида ўлдирилган Эроннинг уч нафар юқори лавозимли расмийсига ишора қилган:
- Ҳусайн Саламий — Эрон Ислом инқилоби қўриқчилари корпуси бошлиғи,
- Генерал Муҳаммад Боғэрий — Эрон ҳарбий кучлари раҳбари,
- Али Шамхоний — Эрон олий раҳнамоси оятуллоҳ Али Хоманаий маслаҳатчиси.
Мақсад Эрон режимини беқарорлаштириш, ўлдирилган раҳбарлар ўрнини эгаллаши мумкин бўлган иккинчи ва учинчи даражали амалдорларни таҳдид остига олиш бўлган, дейди WP нашри.
Разведка операцияси доирасида Исроил агентлари ва қуроллари яширин тарзда Эронга жойлаштирилган. Ҳарбий раҳбарлардан ташқари, Исроил Эрондаги бир қанча етакчи ядро олимларини ҳам йўқ қилганди.
Изоҳ (0)