ТИВ Исроил ва Эрондаги ўзбекистонликлардан имкон қадар хавфсиз ҳудудларга чиқиб кетишни сўради.
Вазирлик вакилининг билдиришича, Яқин Шарқдаги вазиятнинг шиддат билан кескинлашаётгани чуқур хавотир уйғотмоқда. Шу муносабат билан, Ўзбекистон фуқароларидан Исроил ва Эронга сафар қилишдан тийилиш, ушбу мамлакатларда бўлган фуқаролардан эса имкон қадар хавфсиз ҳудудларга чиқиб кетишлари сўралди.
“Хавфсизликни таъминлаш мақсадида зарур чоралар кўрилмоқда, фуқароларимиздан ҳушёрликни сақлашни ва расмий эълонларни кузатиб боришни илтимос қиламиз”, деди ташқи ишлар вазири матбуот котиби Аҳрор Бурхонов.
ТИВ Ўзбекистон доимо минтақадаги барча томонларни ўзаро музокаралар орқали тинчлик йўлида ҳаракат қилишга чақириб келганини эслатиб ўтди.
18 июнь куни Ўзбекистоннинг Исроилдаги элчихонаси ушбу мамлакатни тарк этиш истагида бўлган ўзбекистонликлар қандай йўл билан чиқиб кетиши мумкинлиги ҳақида маълумот берганди. Ҳозирги хавфсизлик вазияти муносабати билан Исроилни мустақил равишда тарк этиш истагида бўлган Ўзбекистон фуқаролари қуйидаги назорат-ўтказиш пунктлари орқали чиқиб кетиши мумкин:
- “Менахем Бегин” / “Таба” — Исроил—Миср чегарасида жойлашган (Исроилнинг Эйлат ва Мисрнинг Таба шаҳарлари ўртасида);
- “Шайх Ҳусайн” — Исроил—Иордания шимолий чегарасида жойлашган (Исроилнинг Байт Sheaн ва Иорданиянинг Ирбит шаҳарлари ўртасида);
- “Исхак Рабин” / “Вади Арава” — Исроил—Иордания жанубий чегарасида жойлашган (Исроилнинг Эйлат ва Иорданиянинг Акаба шаҳарлари ўртасида).
Исроил Туризм вазирлиги томонидан мамлакатда вақтинчалик бўлиб турган туристлар учун хавфсиз тарзда чиқиб кетиш имконини яратиш мақсадида махсус рақамли рўйхатдан ўтиш шакли жорий қилинди. Элчихона мамлакатда мураккаб вазият вужудга келаётганини эътиборга олиб ўзбекистонликларга шахсий хавфсизлик чораларини кўриш ва ракета отишмалари пайтида бошпаналарни тарк этмасликни мунтазам тавсия этиб келмоқда.
Эрондаги элчихона ҳам хавфсизлик чораларига қатъий риоя қилишга чақирди. Ўзбекистоннинг Теҳрондаги элчихонаси ватандошларнинг хавфсиз ҳаракатланишини таъминлаш бўйича доимий алоқа ва мувофиқлаштирув ишларини олиб боряпти. Бугунги кунга қадар Эрондан Туркманистон орқали жами 60 га яқин Ўзбекистон фуқаролари ватанга қайтарилди.
Изоҳ (0)