АҚШ президенти Дональд Трамп Исроил ва Эрон ўртасида ўт очишни тўхтатиш бўйича келишувга эришилганини маълум қилди. Бироқ Эрон ташқи ишлар вазири Аббос Ароқчи мазкур маълумотни рад этди.
Трамп томонлар “12 соатга тўлиқ ўт очишни тўхтатишга” келишиб олгани, шундан сўнг уруш тугаган деб ҳисобланишини айтганди. Бироқ Эрон ташқи ишлар вазири бу борада ҳеч қандай келишув бўлмаганини таъкидлади. Аббос Ароқчи ўз баёнотида “Исроил Эронга қарши уруш бошлаганини, аксинча эмас”лигини қайд этди.
Ҳозирда ўт очишни ёки ҳарбий ҳаракатларни тўхтатиш бўйича ҳеч қандай “келишув” йўқ. Бироқ агар Исроил режими Эрон халқига қарши ноқонуний тажовузини Теҳрон вақти билан эрталаб соат 4 гача тўхтаца, биз жавоб ҳаракатларимизни давом эттиришни режалаштирмаяпмиз, деган Ароқчи тунги баёнотида.
У ҳарбий ҳаракатларни тугатиш бўйича қарор кейинроқ қабул қилинишини айтган. Ҳозирда Эрон ташқи ишлар вазири расмий ташриф билан Москвада бўлиб турибди. У 23 июнь куни Россия президенти Владимир Путин билан учрашган эди.
Маълумот ўрнида, 23 июнь куни Эрон Қатардаги Америка ҳарбий базаларига қарши операция бошлаган эди. АҚШнинг Ироқдаги базаси ҳам ҳужумга учраган. Қатар ўз ҳудудидаги ҳарбий базага берилган зарбалардан сўнг Эроннинг ҳаракатларини қатъий қоралаган. Мамлакат бевосита жавоб беришга ҳақли эканини билдирган. Қатарнинг баёнотини Саудия Арабистони ҳам қўллаб-қувватлаган. Шундан сўнг, Яқин Шарқдаги можаро кучайиши сабабли бир қатор давлатлар ўз ҳаво ҳудудини ёпган.
Трамп эса оташкесимга эришилгани юзасидан баёнот берганди. У Исроил ва Эронни “12 кунлик уруш” деб аталиши керак бўлган воқеани тугатишда “сабр-тоқати, жасорати ва ақл-заковати учун” табриклаганди. Аммо 24 июнь куни Эрон ҳеч қандай музокарага эришилмаганини билдирган ва Исроилнинг Беер Шева шаҳрига баллистик ракеталар билан зарба берган.
Изоҳ (0)