АҚШ Яқин Шарққа қўшимча қирувчи самолётлар ва ҳарбий-денгиз флоти кемаларини жойлаштиради. Бу ҳақда Пентагон раҳбарияти 2 август куни берган маълумотга асосланиб, Reuters нашри хабар берди.
Манбада айтилишича, АҚШ Эрон ва унинг иттифоқчилари минтақада кучайиши ва АҚШ манфаатларига таҳдид солиши ортидан янги ҳарбий қисмлар юборишга қарор қилган. Ушбу қарор рақиб томоннинг эскалация бошлаш хавфини камайтириши маълум қилинган.
Пентагоннинг бир қанча расмийлари Эрон Исроилга зарба беришга тайёрланаётганини айтган. Чунки 2 кун олдин Теҳронда ҲАМАС етакчиси Исмоил Ҳания ўлдирилишида Эрон Исроилнинг “Моссад” айғоқчилик хизматини айблаган ҳамда қасос олишга ваъда берган.
АҚШ мудофаа вазири Ллойд Остин Яқин Шарқ ва Европага баллистик ракеталарни уриб тушира оладиган қўшимча денгиз флоти крейсерлари ва эсминецлар юборилишини маъқуллаган. Шунингдек, Яқин Шарққа қўшимча қирувчи самолётлар эскадрони ҳам жўнатилиши тасдиқланган.
“Остин АҚШ кучларининг ҳимоясини яхшилаш, Исроил мудофаасига кўмакни кучайтириш ва Қўшма Штатлар турли кутилмаган вазиятларга жавоб беришга тайёр бўлишини таъминлаш учун АҚШ ҳарбий штабига тузатишлар киритишни буюрди”, дейилади Пентагон баёнотида.
Изоҳ (0)