Хитой 22 июнь куни БМТ Хавфсизлик Кенгашининг фавқулодда мажлисида АҚШнинг Эрондаги Фордо, Натанз ва Исфаҳондаги ядровий объектига ҳужум қилганини қоралади. Бу ҳақда Global Times хабар берди.
“Хитой АҚШнинг Эронга ҳужумларини ва МАГАТЭ кафолати остида ядровий объектларнинг бомбардимон қилинишига қарши. Қўшма Штатларнинг хатти-ҳаракатлари БМТ низоми, халқаро ҳуқуқнинг мақсад ва тамойилларини, шунингдек, Эроннинг суверенитети, хавфсизлиги ва ҳудудий яхлитлигини жиддий бузади. Улар Яқин Шарқдаги кескинликни кучайтирди ва ядро қуролини тарқатмаслик бўйича халқаро режимга оғир зарба берди”, деди Хитойнинг БМТдаги доимий вакили Фу Конг.
У халқаро ҳамжамият адолатни қўллаб-қувватлаши, вазиятни юмшатиши, тинчлик учун аниқ саъй-ҳаракатларни амалга ошириши кераклигини ҳам таъкидлаган.
“Яқин Шарқдаги кескинликнинг кучайиши шароитида Хитой вазиятнинг издан чиқиш хавфидан жиддий хавотирда. Исроил кескинлашувнинг олдини олиш ва урушнинг тарқалишига қатъий йўл қўймаслик учун зудлик билан ўт очишни тўхтатиши керак. Томонлар халқаро ҳуқуқ нормаларига риоя қилиши, куч ишлатишни жиловлаши, зиддиятни кучайтириши ва оловга мой сепишдан қочиши лозим”, дея қўшимча қилди Фу.
У тинч аҳолини ҳимоя қилишга чақириб, Хитой уруш оқибатида аҳоли орасида кўплаб қурбонлар борлигидан чуқур қайғуда эканини билдирган. Хитой Яқин Шарқда тинчлик ва барқарорликни тиклаш учун саъй-ҳаракатларни амалга оширишга тайёрлиги таъкидланган.
Изоҳ (0)