Исроилнинг “Моссад” разведка агентлиги “Ҳизбуллоҳ” учун мўлжалланган пейжерлар портлатилишидан олдин уларни қўлга киритиб, батареяларига PETН портловчи моддаларини ўрнатган. Бу ҳақда манбаларга таяниб, Sky News Arabia хабар берди.
Ливанда 17 сентябрь куни “Ҳизбуллоҳ” пейжерлари портлатиб юборилиши оқибатида қурбонлар сони 11 кишига етди, 4 мингдан ортиқ киши яраланди. Жабрланганларнинг 400 нафари оғир аҳволда. Улар орасида Эроннинг Байрутдаги элчиси Мажтаб Амани ҳам бор, у “жиддий бўлмаган жароҳат” билан шифохонага ётқизилган. Бундан ташқари, Эрон элчихонасининг яна икки ходими яраланган.
Манбаларга кўра, “Ҳизбуллоҳ” учун мўлжалланган пейжерларга PETН (пентаэритритол тетранитрат) жойлаштирган, у батареялар қиздирилганда портлайди. Исроил разведкаси қурилмалар “Ҳизбуллоҳ”га етказилишидан олдин уларни қўлга киритиб, портловчи моддалар ўрнатган. Шундан сўнг ҳароратини масофадан туриб бошқаришган.
Al Jazeera нашрининг ёзишича, ҳар бир пейжер 20 граммдан кўп бўлмаган портловчи моддалар билан жиҳозланган, қурилмалар Ливанга 5 ой олдин олиб келинган.
“Ҳизбуллоҳ” содир бўлган воқеа учун жавобгарликни Исроилга юклаган ва “кутилмаган адолатли жавоб” қайтаришга ваъда берган. Исроил расмийлари воқеа юзасидан расман изоҳ бермаган. Axios ўз манбасига таяниб, операция Исроил раҳбариятининг яқинда бўлиб ўтган йиғилишида маъқулланганини ёзган.
Изоҳ (0)