Эронда маҳаллий мухолифат блогери Ҳусайн Шанбеҳзода мамлакат олий раҳнамоси Али Хоманаий постига жавобан бир нуқтадан иборат твит ёзгани учун 12 йилга қамалди. Бу ҳақда Iran International хабар берди.
Маълумотни айбланувчининг адвокати Амир Раисиён тасдиқлаган. Шанбеҳзода май ойида твит ёзган. Унинг твити Хоманаийнинг постига қараганда кўпроқ лайк олганидан бир неча ҳафта ўтгач, эркак ҳибсга олинган. Адвокатга кўра, Шанбеҳзода “Исроил фойдасига ташвиқот қилгани учун” 5 йилга, “ислом муқаддасотларини ҳақорат қилгани учун” 4 йилга, “ёлғон маълумот тарқатгани учун” 2 йилга ва “давлатга қарши ташвиқот учун” яна бир йилга қамалган.
Шанбеҳзода 12 йиллик жазонинг 5 йилини қамоқхонада ўтказиши шарт, шундан сўнг муддатидан олдин шартли озод этилиш тўғрисида ариза бериши мумкин. Ҳимоячи ҳукмга нисбатан шикоят қилмоқчи.
Айбловчи Шанбеҳзоданинг энг оғир модда бўйича айбдорлигини исботлай олмаган. Суд бошқа моддалар бўйича қуйидаги далилларни келтирган;
- сиёсий маҳбусларни қўллаб-қувватлаш ва мажбурий ҳижоб кийишни бекор қилиш ҳақидаги постлар;
- #QatllargaЙўқ хештегидан фойдаланиш;
- Эрон сайловларини танқид қилиш;
- собиқ президент Иброҳим Раисийнинг вафоти муносабати билан хурсандчилик билдириш.
Шанбеҳзода 2019 йилда ҳам ҳибсга олинган. Бунга Эронда ёқилғи нархларининг кескин оширилиши туфайли бошланган норозилик намойишлари сабаб бўлган. Ўшанда у “муқаддас қадамжоларни ва Эрон раҳбарини ҳақорат қилиш”да айбланган, Ислом инқилоби қўриқчилари корпусига алоқадор оммавий ахборот воситалари уни Моссад агенти деб эълон қилган.
Изоҳ (0)