Исроил яқин орада Эронга қарши ҳарбий операцияни якунлашга умид қилмоқда ва аллақачон АҚШга тегишли сигналларни юборган. Бу ҳақда яҳудий давлати расмийларига таяниб Reuters хабар берди.
Манбаларга кўра, Исроилнинг авиазарбаларни тугатиш қарори Теҳроннинг кейинги ҳаракатларига боғлиқ бўлади. Яҳудий расмийлари жорий кампанияни якунлашга, Эроннинг ракета, дронлар ҳужумини тўхтатишга ва кейинги ҳужумлардан қочиш имконини берадиган чиқиш стратегиясини шакллантиришга ҳаракат қилмоқда.
Биз ҳали якуний мақсадга эришганимиз йўқ, аммо бу ҳафталар эмас, кунлар масаласига ўхшайди. Исроил нуқтайи назаридан, операциянинг тугашига оз қолди, деди Reuters агентлигига Исроил миллий хавфсизлик бўйича маслаҳатчиси собиқ ўринбосари Эран Лерман.
Унинг фикрини Исроилнинг уч амалдори ҳам тасдиқлаган. Шунга қарамай, баъзи расмийлар ва таҳлилчилар фикрича, Тель Авив можаронинг тугаш муддатини назорат қила олмайди. Агар Эрон кескинлашувни давом эттиришга қарор қилса, узоқ ва қимматга тушадиган урушга аралашиб қолиши хавфи бор.
Гарчи Исроил расмийлари ҳарбий операция тез орада якунланишини айтган бўлса-да, Европа дипломатлари ва Яқин Шарқ мамлакатлари вакиллари Reutersʼга берган изоҳларида Исроил бу режалари ҳақида АҚШдан бошқа иттифоқчиларига маълумот бермаганини таъкидламоқда.
Исроил армияси ва ҳукуматидаги расмийлар вазият қандай ривожланиши энди фақат Эроннинг ҳаракатларига боғлиқ эканини айтган.
Энди бу эронликларга боғлиқ, деди исроиллик ҳарбийлардан бири.
Агар Теҳрон янги ҳужумлардан воз кечса, Исроил операцияни имкон қадар тез тугатмоқчи, дея хабар беради манбалар.
Икки европалик дипломатнинг фикрича, Эрон расмийлари вазиятни юмшатиш ниятини аниқ кўрсатиши керак. Бироқ улардан бирига кўра, агар Эрон олий раҳнамоси Оятуллоҳ Али Хоманаий ўзини хавфсиз ҳис қилса, у можарони чўзиб юбориши ва уни узоқ муддатли қарама-қаршиликка айлантириши мумкин.
Изоҳ (0)