Инсон организмининг қариш жараёни 25–28 ёшда бошланади. Бу ҳақда Федерал тиббий-биологик агентлик биринчи ўринбосари Татьяна Яковлева маълумотига таяниб “РБК” нашри хабар берди.
Татьяна Яковлева замонавий соғлиқни сақлаш концепциясида касалликларни даволашдан кўра олдини олиш ва соғлиқни бошқаришга урғу бераётганини таъкидлади. Унинг фикрича, узоқ умр кўриш учун нафақат илғор тиббий технологиялар, балки мунтазам текширувлар, онгли ҳаёт тарзи, тўғри овқатланиш, ментал амалиётлар ва соғлом турмуш тарзи муҳимдир.
Яковлева корпоратив соғлиқни сақлаш дастурларига қизиқиш ортиб бораётганини, иш берувчилар бундай ташаббусларни фаол қўллаб-қувватлаётганини айтди. Ҳаётни узайтириш учун энг самарали усуллар иш жойида жисмоний фаолият, руҳий саломатлик ва стрессга қарши дастурлар, соғлом овқатланиш ва тиббий профилактикадир. Унинг сўзларига кўра, ҳафтасига 150 дақиқа спорт билан шуғулланиш ўлим хавфини 30 фоизга камайтиради.
Россия Соғлиқни сақлаш вазирлигининг бош педиатри Олга Ткачева эса қариш суръати ҳомиладорлик режалаштирилаётган босқичда белгиланади ва ота-онанинг соғлиғи, онанинг ёши ҳамда ҳомиланинг бачадондаги ривожланиши билан боғлиқ бўлади, деб таъкидлайди.
Геронтолог Олга Ткачева узоқ умр кўришга ёрдам берувчи олти қоида ҳақида гапирган. Уларнинг орасида соғлом уйқу, машқлар, тўғри овқатланиш ва жисмоний фаоллик мувозанати, фойдали стресс ва сурункали касалликларнинг олдини олиш бор.
Шифокор ҳаётни узайтириш учун овқатланиш ва жисмоний фаоллик мувозанатини сақлаш зарурлигини эслатди. Optimaл жисмоний машқлар сифатида у ҳар куни камида 40 дақиқа югуриш ёки тез юришни тавсия қилди. Бошқа томондан, психоэмоционал саломатликка ғамхўрлик қилиш, ижобий кайфиятни сақлаш ва иш ҳамда дам олиш мувозанатини таъминлаш муҳимдир. Тонусни сақлашда “фойдали стресс” — яъни ёқимли ҳаяжон ёрдам беради. Ҳаётни узайтирувчи яна бир омил — яхши уйқу, ўртача 6 дан 8 соатгача давом этади.
Изоҳ (0)