Мултивитаминлар организмни тез тиклаш усули бўлиб кўринади. Аммо уларни қон таҳлилисиз, танадаги етишмовчиликларни тушунмасдан ва шифокор билан маслаҳатлашмасдан қабул қилиш мумкин эмас.
Ҳатто фойдали витаминларни ҳам пала-партиш, бир вақтда ва ўзаро таъсирини тушунмасдан қабул қилсангиз, бир-бирига халақит бериши мумкин.
Биргаликда қабул қилиш тавсия этилмайдиган бирикмалар:
- Кальций ва темир. Бу суяклар ва қувватни сақлаш учун классик комбинация бўлиб туюлади. Бироқ бу икки минерал ичакда бир-бири билан рақобатлашади. Оқибатда иккаласи ҳам тўлиқ ўзлаштирилмайди. Уларни қабул қилиш орасида камида 4-6 соат танаффус қилган маъқул.
- Магний ва рух (юқори дозаларда). Иккаласи ҳам асаб тизими ва иммунитет учун муҳим. Аммо катта миқдорда улар бир-бирининг таъсирини пасайтириб, фаолиятига халақит беради. Тўғри мувозанатсиз фойда кам бўлади.
- C витамини ва мис. Аскорбин кислотаси кўпинча зарарсиз қўшимча сифатида қабул қилинади. Бироқ юқори дозаларда у миснинг сўрилишини камайтириши мумкин — бу эса моддалар алмашинуви ва иммунитет тизими учун хавф туғдиради.
- Фолий кислота ва рух. Фолий, айниқса ақлий зўриқиш ёки тикланиш даврларида зарур. Аммо у ҳаддан ортиқ бўлса, рухнинг сўрилишига тўсқинлик қилиши мумкин — бу эса тери, гормонлар ва иммунитет учун салбий оқибатларни келтириб чиқаради.
- Э витамини ва темир. Э витамини темирнинг фаоллигини нейтраллаштириб, унинг вазифасини бажаришига халақит бериши мумкин.
Аммо шундай БФҚ (биологик фаол қўшимча)лар борки, улар бир-бирини тўлдиради — алоҳида қўлланилгандан кўра кўпроқ наф келтиради.
Биргаликда қўлланиши шарт бўлган бирикмалар:
- Д витамини + магний. Агар магний етишмаса, Д витамини фаоллашмайди. Магний уни фаоллаштиради ва яхши ўзлаштирилишини таъминлайди. Шунинг учун бу минералсиз ҳатто энг “замонавий” D3 қўшилмаси ҳам фойдасиз бўлиб қолиши мумкин.
- C витамини + темир. Аскорбин кислотаси темирнинг ўзлаштирилишига ёрдам беради ва унинг самарадорлигини оширади.
- Кальций + К2 витамини + D3 витамини. D3 кальцийнинг сўрилишига ёрдам беради, К2 эса унинг керакли жойга — томирларга эмас, балки суякларга боришини таъминлайди. Улар ҳамжиҳатликда ишлайди ва бир-бирини мукаммал тўлдиради.
- Рух + B6 витамини + магний. Бу формула, айниқса, стресс, ақлий чарчаш ёки уйқу муаммолари пайтида жуда фойдали. Рух ва магний асаб тизимини қўллаб-қувватлайди, B6 эса уларнинг янада самаралироқ ишлашига ёрдам беради.
БФҚлар шунчаки бир восита. Ҳар қандай воситада бўлгани каби уларнинг ҳам қўллаш қоидалари бор. Тўғри танланганда, қўшимчалар ҳақиқатан ҳам самара беради. Чунки ҳатто керакли қўшимча нотўғри вақтда ёки ҳаддан ташқари юқори дозада қабул қилинса, аксинча таъсир кўрсатиши мумкин.
Шуни ёдда тутиш керакки, БФҚлар шунчаки таблетка эмас, балки физиологияга таъсир кўрсатувчи фаол моддадир. Ёндашув қанчалик тўғри бўлса, натижа шунчалик кўнгилдагидек бўлиб, ёрдам бериш эҳтимоли юқори бўлади.
Изоҳ (0)