Қанчалик фаол ва соғлом турмуш тарзини олиб бормайлик, мавсумлар алмашиш даврида барибир куч-қувватимиз пасайганини ҳис қиламиз ёки тез-тез касалланиб қоламиз.
Остеопатия нима?
Остеопат шифокор соматик дисфункцияларни даволаш билан шуғулланади. Содда қилиб айтганда, бу функсионал бузилишлар, яъни ҳар қандай тўқималардаги ўзгаришлардир. Булар суяклар, мускуллар, пайлар ёки ички аъзолар бўлиши мумкин. Остеопат таркибий органик ўзгаришлар, яъни энди нормал ҳолатга қайтариб бўлмайдиган ўзгаришлар билан ишламайди. Бундай ҳолларда остеопат фақат қисман ёрдам кўрсатиши мумкин.
Остеопат иммунитетга қандай таъсир кўрсатиши мумкин?
Албатта, остеопат иммунитет тизимига тўғридан-тўғри таъсир кўрсата олмайди. Мутахассис бутун тана билан ишлайди, барча даражадаги тўқималарнинг сиқилиши ва ҳаракатчанлигининг бузилишини бартараф этади. Бундай иш жараёнида шифокор заиф ҳудудларни аниқлайди. Кўпинча иммунитет пасайиши ва чарчоқ ҳисси бундай ҳудудларнинг нормал ишлашини таъминлаш учун тана кўпроқ энергия сарфлаши билан боғлиқ. Танадаги зўриқиш ва сиқилишларни бартараф этиш орқали шифокор мувозанат ва симметрияни тиклайди. Шундай қилиб, мувозанатни сақлаш учун организмнинг энергия сарфи камаяди ва унинг вирусларга чидамлилиги ошади.
Остеопатни қандай аниқлаш мумкин?
Агар бола ёки катталар йилига тўрт мартадан кўп ЎРВИ билан касалланса, албатта остеопатга ёзилиш керак. Ҳатто арзимас микрожароҳатлар ҳам танадаги мувозанатнинг бузилишига олиб келади. Натижада, инсон тез-тез касал бўла бошлайди ёки вирусли касалликдан кейин узоқроқ тикланади.
Ковиддан кейин тикланишда остеопат ёрдам бера оладими?
Албатта, турли хил остеопатик усуллар постковид синдроми деб аталадиган ҳолат билан самарали ишлайди: ортиқча чарчоқ, мушаклар ва тананинг турли қисмларидаги оғриқлар, бош оғриғи (кучли оғриқдан тортиб бошда доимий оғирлик ҳиссигача), қисқа муддатли хотиранинг пасайиши, астения, ҳиссий бузилишлар, ошқозон-ичак тракти, сийдик-таносил тизими муаммолари ва бошқа ҳолатлар.
Остеопат стресс билан ишлай оладими?
Асаб тизимини мувозанатлаштириш учун турли хил усуллар мавжуд. Бемор билан суҳбатлашиб, маълум тестларни ўтказгач, шифокор ўз таъсирини қайси йўналишга қаратишни белгилайди: асаб тизимини фаоллаштириш ёки аксинча, бўшаштиришга. Яна бир муҳим ва қизиқарли жиҳат - остеопат диафрагмани бўшаштириш орқали ёрдам бериши мумкин. Бу кўкрак қафаси ва қорин бўшлиғини ажратиб турадиган энг муҳим ва катта нафас мушаги ҳисобланади. Ҳар қандай ҳиссий зўриқиш туфайли диафрагма таранглашиши мумкин. Худди шундай, ҳиссий муаммолар тўпланадиган ҳудудлар — чайнов мушаклари, бўйин ва орқа. Бу соҳаларни бўшаштириш орқали мутахассис беморнинг аҳволини ва ҳатто ҳаётга бўлган муносабатини яхшилайди. Аммо кўпинча психолог, невролог, кинезиолог каби бошқа мутахассисларнинг ёрдами ҳам талаб қилиниши мумкин.
Умумий тавсиялар
- Стрессни бошқариш замонамизда жуда муҳим кўникма. Сиз учун у билан курашишда нима ёрдам беришини ўйлаб кўринг.
- Бўшашиш техникаларини ўзлаштиринг: медитация, нафас олиш машқлари ва ҳоказо.
- Агар ёрдам бермаса, психолог ёки психотерапевтга мурожаат қилинг, у ташвиш билан қандай курашиш кераклигини тушунтиради.
- Севимли машғулотларингиз ва қизиқишларингизни унутманг.
- Кўпроқ ва тўғри ҳаракат қилишга интилинг, жисмоний машқларни эътиборсиз қолдирманг.
- Қадди-қоматингизга эътибор беринг, айниқса стол атрофида кўп ишласангиз. Мутахассис уни тузатишга ёрдам берадиган машқларни тавсия қилади.
- Агар сизни бирор нарса безовта қилса ёки сурункали касалликларингиз бўлса, ўз вақтида шифокорга мурожаат қилинг.
Ўрта Ер денгизи парҳезига риоя қилиш энг яхши танлов. Бундай овқатланиш тартиби асосини янги сабзавотлар, кўкатлар, ёнғоқлар, уруғлар, мавсумий резаворлар ва мевалар, балиқ ва денгиз маҳсулотлари, шунингдек, бутун донлар ташкил этади. Шакар, фастфуд, яримтайёр маҳсулотлар эса чиқариб ташланади ёки камайтирилади. Бундай овқатланиш тартиби мувозанатли бўлиб, организм зарур минераллар, витаминлар, ёғ кислоталарини олади, бу эса асаб тизими ва иммунитетни мустаҳкамлашга ёрдам беради.
Изоҳ (0)