Сиз, албатта, бу сеҳрли рақам — кунига 10 000 қадам юриш ҳақида эшитгансиз. Маълум бўлишича, бу шунчаки замонавий тренд эмас, балки 1960 йилларда Токиодаги Олимпия ўйинлари олдидан Япониянинг маркетинг кампанияси туфайли пайдо бўлган тавсиядир. Мутахассисларнинг таъкидлашича, ўша пайтда ҳам олимлар ҳаракат — бу саломатлик ва узоқ умр эканини тушунишган.
Хўш, агар сиз бир ой давомида виждонан 10 000 қадам ташласангиз, танангизда нималар содир бўлади?
Аввало, бу аслида қанча масофа эканини аниқлаб олайлик. 10 000 қадам бу тахминан 8 километр ёки кунига 60-90 дақиқа пиёда юриш демакдир. Бу анча кўп эшитилса-да, лекин амалда ишга бориб қайтаётганингизда ёки кечки сайр вақтида қадамлар сезилмай йиғилаверади.
Энди пиёда юришнинг ёқимли бонуслари ҳақида бўлишамиз. Мунтазам пиёда юришни бошлаганингиздан бир ой ўтгач, юрагингиз сизга раҳмат айтади — қон айланиши яхшиланади, қон босими пасаяди, юрак касалликлари хавфи камаяди. Сиз ўзингизда энергия оқимини сезасиз, чунки сизнинг ҳужайра “электр станцияларингиз” — митохондриялар самаралироқ ишлай бошлайди. Кайфиятингиз яхшиланади ва кортизол ишлаб чиқаришнинг камайиши туфайли стресс даражаси пасаяди. Айниқса, эрталаб сайр қилиш фойдали — қуёш нури сиркад ритмларини (бу организмдаги турли хил физиологик жараёнларни, шу жумладан уйқуни, тана ҳароратини, гормонлар ишлаб чиқаришни ва овқат ҳазм қилишни тартибга солувчи 24 соатлик цикллардир) нормаллаштиришга ва уйқуни яхшилашга ёрдам беради.
Вазнга келсак, овқатланишни ўзгартирмасдан ҳам пиёда юриш кунига 300-500 калория танқислигини яратишга ёрдам беради. Бир ой ичида бу 5 кг гача ортиқча вазн йўқотишга олиб келиши мумкин. Тўғри, бир нюанс бор — агар сиз аллақачон яхши ҳолатда бўлсангиз, 4-6 ҳафтадан кейин ривожланиш тўхтаб қолиши мумкин. Бундай ҳолда, мутахассислар интервалларни қўшишни, тепаликка кўтарилишни ёки оғирлаштирувчи воситалардан фойдаланишни маслаҳат беради.
Соғлиқни сақлаш, масалан, қон босими ёки холестерин даражасини меъёрга келтириш ҳақида гап кетганда, километрлик масофалар эмас, балки маълум тамойилларга риоя қилиш муҳим аҳамият касб этади.
Аввало, ҳар бир сайр ўттиз дақиқадан кўпроқ давом этиши керак. Бу организм углеводларни эмас, балки жигарда ва мушакларда сақланадиган гликогенни сарфлашни бошлаши учун зарур.
Бундан ташқари, жисмоний фаолликнинг интенсивлиги муҳим аҳамиятга эга. Буни юрак уриш тезлиги билан ўлчаш мумкин. Тинч ҳолатда одамнинг пулс тезлиги ўртача дақиқасига 60 дан 90 гача уришни ташкил қилади. У 10 минг қадамга яқин юрганида, пулс тахминан 20-30 гача ошиши муҳим. Агар секин юриш туфайли бу содир бўлмаса, демак, юклама жуда кичик ва соғлиқ учун сезиларли фойда келтирмайди.
10 000 қадам — бу догма эмаслигини тушуниш муҳим. Янги бошлаганлар учун 5 000 қадам ҳам етарли, кўпчилик эса 7 000-8 000 қадамда ҳам ижобий таъсирни ҳис қилади. Асосийси — мунтазам ҳаракат қилиш ва ўз танангизни тинглашдир. Мураббийларнинг таъкидлашича, пиёда юриш — бу чарчатадиган машғулот эмас, балки организм билан уйғунликда ишлайдиган ёқимли одатдир.
Шундай қилиб, агар сиз соғлиғингизни кескин чоралар кўрмасдан яхшилашни истасангиз, бир ой давомида кунига 10 000 қадам юришга ҳаракат қилинг. Танангиз буни албатта қадрлайди ва сиз, эҳтимол, ўзингиз учун янги, фаол ҳаёт тарзини очасиз. Эҳтимол, келгуси ойда сиз қадамлар сонини оширишни хоҳларсиз?
Изоҳ (0)