Республикада жорий йил 1 августдан меҳнатга ҳақ тўлашнинг энг кам миқдори 10 фоиз оширилиб, 1 млн 271 минг сўмга етказилди. Бу ўзгариш сафарбарлик чақирув резерви (1 ойлик ҳарбий хизмат) тўловига таъсир қилади.
Сафарбарлик чақирув резерви тўлов бадали бевосита меҳнатга ҳақ тўлашдаги энг кам миқдорнинг 7 баробарига тенг. Демак, августдан бир ойлик ҳарбий хизмат ҳақи ҳозирги 8 млн 85 минг сўмдан 8 млн 897 минг сўмга оширилади.
Ўзбекистонда 2019 йилдан бошлаб меҳнатга ҳақ тўлашнинг энг кам миқдори жорий этилган. Мазкур тўлов миқдори оширилгани сари бир ойлик ҳарбий хизмат нархлари қуйидагича ўзгарган:
- 2019 йил — 4 млн 40 минг сўм;
- 2020 йил — 4 млн 755 минг сўм;
- 2021 йил — 5 млн 754 минг сўм;
- 2022 йил — 6 млн 440 минг сўм;
- 2023 йил — 6 млн 860 минг сўм;
- 2024 йил — 8 млн 85 минг сўм.
Сафарбарлик чақирув резерви сафига қабул қилинганлардан пул бадаллари бирйўла ёки бир йил мобайнида бўлиб тўлаш орқали олинади. Мазкур маблағлар Мудофаа вазирлигининг “Сафарбарлик чақируви резерви маблағлари” махсус ҳисобрақамида жамланади. Пуллар муддатли ҳарбий хизматчиларга нафақа тўлаш, вазирлик моддий-техника базасини мустаҳкамлаш ва сафарбарлик чақируви резерви хизматчилари таъминотига йўналтирилади.
Фуқаролар сафарбарлик чақируви резервидаги хизмат сафига 27 ёшга тўлгунга қадар олинади. Улар хизматни ўташ даврида ойлик ҳарбий йиғинларга, фавқулодда вазиятлар ёки Ўзбекистонга қарши қуролли тажовуз рўй берган тақдирда ҳақиқий ҳарбий хизматга жалб қилиниши мумкин.
Изоҳ (0)