Қаҳрамонимиз Саида Абдумўминова Мудофаа вазирлигига қарашли Хизмат итларини тайёрлаш марказидаги ягона аёл кинолог ҳисобланади. Одатда, бу касбда хотин-қизлар ишлашни унчалик исташмайди. Чунки бу соҳа эгаларидан нафақат, жисмоний тайёргарлик, балки жонивор билан тил топишиш ҳам талаб этилади.
Кичик сержат Саида Абдумўминова “Дарё” мухбири Наргиза Муродова билан бўлган суҳбатда бу соҳага кириб келишига нима сабаб бўлгани ҳақида сўзлаб берди.
— Болалигимдан ҳарбий аёллар эгнидаги формага ҳавас қилиб, шу соҳада ишлашни мақсад қилганман. Коллежни тамомлаб, Ички ишлар соҳасида ишлаш учун ҳужжат топширганман. Аммо ишга қабул қилинмаганман. Ундан кейин бор эътиборимни спортга қаратиб, енгил атлетика бўйича спорт устаси бўлганман.
2019 йили Жисмоний тарбия университетини тамомлаш арафасида Мудофаа вазирлиги айнан спорт соҳасидаги қизларни ишга таклиф этаётгани ҳақидаги хабарни ўқидим. Болаликдаги орзумни амалга ошириш учун суҳбатдан ўтдим ва ишга қабул қилиндим.
Кинология соҳасига кириб келишим жуда қизиқ бўлган. Халқаро армия ўйинларининг тақдирлаш жараёнларида кинолог йигитларнинг фаолиятини кўриб ҳавас қилганман. Улар ҳам халқаро армия ўйинларида иштирок этиб, икки марта чемпион бўлишган экан. Жониворларни яхши кўрганим учун улардан йўл-йўриқ ўрганиб кинология соҳасига кириб келдим.
Итлар билан ишлашнинг ўзига яраша завқи бор. Улар ўзига яқин олган инсонни яхши ҳис қилади. Биз хизмат итларини тайёрлашда Ички ишлар, Божхона ва Чегара қўшинлари билан ҳамкорликда иш олиб борамиз. Кимгадир ёрдам керак бўлса кинолог содиқ дўсти хизмат ити билан керакли манзилга бориб, вазифасини ситқидилдан адо этади.
Ўтган йили Туркияда бўлган зилзила майдонига марказимиздан 5 нафар сержат хизмат итлари билан бориб, вайроналар остидан кўплаб инсонларни қутқарди. Мутахассис итларини тайёрлаш марказида ишлаётганимдан фахрландим. Чунки биз тайёрлаётган хизмат итлари содиқ аскардек хизмат қилади. Жиноятчиликнинг олдини олиш ёки фалокатлардан кейинги вазиятни ўнглашда уларнинг хизмати жуда катта.
Оилалиман, бир нафар қизалоғим бор. Яширмайман, кинология соҳасини танлашимга ота-онам бир оз қарши бўлган. Спортчи бўлганим учун бу ишни уддалаб кетишимга уларни ишонтирганман. Ишимиз осон ва аёлларга мос деёлмайман.
Халқаро армия ўйинларига ойлаб тайёргарлик кўрамиз, иш юзасидан Республиканинг турли ҳудудларига борамиз. Ит билан ҳар куни камида 3-4 соат машғулотлар ўтамиз. Аммо инсон касбини ва албатта, ватанини севса қийинчиликлар сезилмайди.
Мен касбимдан фахрланаман ва биз тайёрлаётган хизмат итлари соҳа ривожига ўз ҳиссасини қўшаяпти, деб ҳисоблайман дейди, — Мудофаа вазирлигига қарашли Хизмат итларини тайёрлаш маркази кичик сержанти Саида Абдумўминова.
Изоҳ (0)