Исроил ҳарбийлари 2023 йил 7 октябрдан буён Ғазодаги ҳужумларда АҚШ сунъий интеллектларидан кенг фойдаланган. Бу ҳақда Associated Press хабар берди.
Ғазога ҳужум пайтида Исроил армияси томонидан ишлатилган сунъий интеллект (СИ) тизимларида тинч аҳолининг ўлимига олиб келиши мумкин бўлган хатолар аниқланди. Яҳудий давлати СИдан кенг кўламли разведка маълумотлари, тутиб олинган алоқалар ва кузатув орқали шубҳали нутқни аниқлаб, одамлар ҳаракатларини ўрганган. Исроил Ливанга ҳужумларда ҳам сунъий интеллектдан фойдаланган. Бироқ СИ маълумотларида “фуқаролик ва ҳарбий мақсадлар ўртасида ҳеч қандай фарқ бўлмаган”.
Келажакда технологиянинг бундай ноқонуний урушларни амалга оширишдаги роли учун таъсирлар жуда катта бўлади, дейди AI Now институтининг бош сунъий интеллект олими ва OpenAI’нинг собиқ хавфсизлик бўйича катта муҳандиси Ҳеиди Кҳлааф.
Исроил томонидан тинч аҳолини кузатиш мақсадида қўлланиладиган “Habsora”, “Lavender” ва “Whеrе is Daddy?” каби сунъий интеллект тизимлари Американинг сунъий интеллект компаниялари томонидан қўллаб-қувватланишда давом этмоқда. Исроил разведкаси вакилининг айтишича, ҳарбийлар Microsoft Azure’дан фойдаланиб, маълумотларни тўплайди, улар ( телефон қўнғироқлар, матнли ва овозли хабарлар) кейинчалик расшифровка ва таржима қилинади.
Амалдорнинг таъкидлашича, Azure катта ҳажмдаги матнда атамаларни тезкор қидирув учун қўлланилади, бу эса армиянинг сунъий интеллект тизимларига бир-бирига кўрсатма бераётган шахсларни аниқлаш ва уларнинг жойлашувини белгилаш имконини беради.
2023 йил 7 октябрдан бошлаб Исроил ҳарбийлари OpenAI моделларидан, шунингдек, нутқни расшифровка ва таржима қилиш имкониятларидан кенг фойдаланмоқда.
Маълумотлар баъзан ноаниқ бўлиши мумкин, бир марта тизим 1000 га яқин лицей ўқувчисини “потенциал жангарилар” деб нотўғри аниқлаган, дейди исроиллик расмий.
Сунъий интеллект ҲАМАСга алоқадор, аммо у ерда яшамайдиган шахснинг уйини ҳам аниқлай олади, шундан сўнг бу объект нишонга айланади.
Тадқиқотга кўра, 2024 йил март ойида Исроил ҳарбийлари томонидан OpenAI ва Microsoft асосидаги сунъий интеллектдан фойдаланиш 2023 йил 7 октябрь ҳужумларидан олдинги даврга нисбатан деярли 200 баробар ошган. Ҳарбийлар томонидан Microsoft серверларида сақланаётган маълумотлар ҳажми 2024 йилнинг март июль ойларида икки баробар кўпайиб, 13,6 петабайтдан ошди.
Бу сунъий интеллектнинг тижорат моделлари тўғридан тўғри ҳарбий ҳаракатларда қўлланилишининг биринчи тасдиғидир, деди Ҳайди Кҳлааф.
AP маълумотларига кўра, Исроил ҳарбийлари Microsoft Azure булутли платформаси ва OpenAI орқали тақдим этиладиган илғор сунъий интеллект моделларини сотиб олган. Америка технология компаниялари орасида Microsoft Исроил армияси билан “яқин алоқалар” ўрнатган ва бу алоқалар 7 октябрдан кейин “янада мустаҳкамланган”.
AP агентлиги томонидан кўриб чиқилган ҳужжатларга кўра, 2021 йилда Microsoft Исроил Мудофаа вазирлиги билан уч йиллик 133 миллион долларлик шартнома имзолаган, бу эса Исроилни компаниянинг АҚШдан кейинги иккинчи йирик ҳарбий буюртмачисига айлантирган.
Бундан ташқари, Исроил ҳарбийлари 7 октябрдан тахминан икки ҳафта ўтгач, Microsoft Azure’га техник ёрдам сўрови билан мурожаат қилган. Хусусан, исроилликлар “режалаштирилган техник хизмат кўрсатиш узилишларини йилнинг қолган қисмига қолдиришни” сўраган. Чунки ҳар қандай узилиш “ҳаётий таъминот тизимларига” бевосита таъсир кўрсатиши таъкидланган.
7 октябрдан кейинги тахминан 10 ой ичида Microsoft Azure Исроил ҳарбийлари томонидан юборилган 130 га яқин техник ёрдам сўровига жавоб берган.
Шу билан бирга, Microsoft маълумотлари Тель-Авивдан ташқарида тиканли сим билан ўралган иккита улкан бинодаги серверларда сақланади. Тель-Авив яқинидаги Герслия шаҳридаги 46 минг квадрат метрлик корпоратив кампус эса Microsoft бошқарувида.
Изоҳ (0)