Қозоғистон мудофаа вазири Руслан Жаксиликов геосиёсий вазият, КХШТга аъзолик ва ҳарбий хизматчилар маоши ҳақида гапирди. Бу ҳақда у Tengrinews’га берган интервьюсида маълум қилди.
![](/static/2024/08/19/photo_2024-08-19_14-27-14-87bJcFxu.jpg)
Вазирдан бугунги кунда дунё анча мураккаб геосиёсий вазиятга дуч келгани, шу боис Қозоғистон армияси қай даражада тайёр экани сўралди.
“Геосиёсий вазият масаласи жуда мураккаб. Лекин шуни таъкидлашни истардимки, давлат раҳбари, ҳукуматимиз ва жамиятимиз сиёсати туфайли Қозоғистонда қўшниларимизнинг ҳеч бири билан муаммо йўқ. Қозоғистон давлат чегаралари бўйича ҳал этилмаган муаммоларга эга бўлмаган дунёдаги ягона давлатдир.
Қозоғистоннинг ҳар қандай таҳдид ва хатарларга ҳар қандай ҳолатда жавоб беришга тайёрлиги унинг мустақил миллий замонавий армияси мавжудлиги билан ҳам изоҳланади. Чунки Қозоғистон Қуролли кучлари давлатчиликнинг асосий институтларидан биридир”, деди у.
Бироқ вазир армия сони ҳақидаги саволга у “бугунги вазият учун мос келиши” билан чекланди. Жаксиликовдан Қозоғистоннинг КХШТ ва ШҲТга аъзолиги қандай имкониятлар тақдим этиши сўралди.
“Биринчидан, Қозоғистон тарихан КХШТ таркибига киради, бу ташкилот мустақиллигимизнинг бошида шу уюшма доирасида тинчлик ва конституциявий тартибни сақлаш мақсадида тузилган. Кейинчалик Шанхай ҳамкорлик ташкилоти пайдо бўлди, унда ҳарбий блок ҳам мавжуд. Бу бизга нима беради? Бу икки қудратли ташкилот ҳудудларимиздаги тинчлик ва тотувликни таъминлашга интилиб, давлатларимиз равнақига ўз ҳиссасини қўшмоқда. Бу биз учун фойдали, давлат раҳбари бу вазифаларни яхши тушунади. Биз бу икки ташкилот доирасида ҳамкорликни кенгайтирмоқдамиз”, деди у.
![](/static/2024/08/19/photo_2024-08-19_14-34-06-wZbPHtnU.jpg)
Шу билан бирга, Руслан Жаксиликов ҳарбий хизматчилар маоши ҳақидаги саволга ҳам жавоб берди.
“40 йилдан ортиқ хизмат қиляпман. Ҳарбий кишининг фаровонлик даражаси ҳар доим, ҳатто совет даврида ҳам юқори бўлган, дейиш бир оз нотўғри. Нима учун? Чунки фаровонлик даражаси ҳар доим барча зарур масалаларни: оила, болалар, шахсий фаровонлик, қандайдир жамғармалар ва бошқаларни ҳал этишга имкон берган. Албатта, биз ҳамма нарсани: яхши уйни, яхши машинани, болаларни ўқитиш имкониятини, уларнинг кейинги ривожланишини хоҳлаймиз. Лекин келинг, давлатнинг иқтисодий имкониятларидан келиб чиқамиз. Давлат бизга бериши мумкин бўлган нарсани тақдим этади”, деди Жаксиликов.
Мудофаа вазири 2023 йилда вазирлик уч тоифадаги ҳарбий хизматчилар: ҳарбий учувчилар, шифокорлар ва педагогларнинг иш ҳақини оширганини айтди.
“Ҳарбий шахс учун, албатта, иш ҳақини ошириш муҳим, лекин ижтимоий имтиёзларни тиклашга қайтиш керак, чунки ижтимоий имтиёзлар анча муҳимроқдир. Элементар, илгари ҳарбий хизматчиларга коммунал хизматларнинг 50 фоизи тўланарди. Албатта, 50 фоизини бўлмаса-да, камида 30-40 фоизини қайтариш масаласи кўриб чиқилса, хурсанд бўламиз. Йилига бир марта ҳарбий хизматчилар ва оила аъзоларининг дам олиш жойига саёҳати бепул. Бу унчалик катта муаммо эмас”, деди у.
Шу билан бирга, вазир ҳарбийлар учун маош ошиб бораётгани ва бу унвонга боғлиқлигини хулоса қилди.
Изоҳ (0)