Япония Мудофаа вазирлиги хавфсизлик сектори харажатлари учун бюджетдан рекорд даражада — 8,54 триллион иен (тахминан 59 миллиард доллар) ажратишни сўради.
Сўров кўриб чиқиш учун Молия вазирлигига юборилади, шундан сўнг декабрь ойи охирида уни тасдиқлаш тўғрисида қарор қабул қилинади. Келгуси йил бюджети деярли тарихдаги энг катта бюджет бўлиши кутилмоқда — Япония кетма-кет 11 марта ўз рекордини янгилайди.
Қайд этилишича, маблағлар Токио охирги пайтларда диққатини қаратаётган барча соҳаларга йўналтирилади. Масалан, ҳаво ҳужуми, ракета зарбаларига қарши мудофаани ривожлантириш, дронлар ва узоқ масофага учадиган ракеталар ишлаб чиқариш шулар жумласидандир.
Японияда юқори ҳарбий технологияларнинг ривожланишига қарамай, мудофаа кучларининг асосий муаммоларидан бири кадрларнинг етишмаслиги бўлиб қолмоқда. Мамлакат армияда хизмат қилиш учун керакли миқдордаги одамни жалб қила олмаяпти.
2023 йил февраль ойида ушбу муаммони ҳал қилиш бўйича комиссия расмийлар ҳарбий хизматчиларнинг маошларини ошириши ва уларнинг турмуш шароитини яхшилашга эътибор қаратиши кераклигини таъкидлади. Бироқ кадрларга ажратилаётган маблағлар пасайишда давом этмоқда. Бу йилги мудофаа бюджетининг 29 фоизи армия хизматчиларига ажратилиши кўзда тутилган бўлса, кейинги йил бу кўрсаткич 27% бўлиши кутилмоқда.
Изоҳ (0)