Мудофаа вазирлигида 26 апрель куни Ҳаво ҳужумидан мудофаа қўшинлари ва Ҳарбий ҳаво кучлари қўмондони, генерал майор Аҳмад Бурхонов ва Туркия Ҳарбий ҳаво кучлари қўмондони армия генерали Атилла Гулан учрашди.
Музокаралар давомида икки давлат ўртасидаги дўстлик алоқаларини янада мустаҳкамлаш, ҳарбий ҳаво кучлари соҳасида ҳамкорлик, бу борада соҳа мутахассисларининг малакасини ошириш истиқболлари атрофлича муҳокама қилинди. Учрашув сўнгида томонлар бир-бирига эсдалик совғалари топшириб, ўзларининг тилакларини билдирди.
Шунингдек, куннинг иккинчи ярмида делегация вакиллари Чирчиқ шаҳрида жойлашган ҳарбий қисмда бўлиб, қисм фаолияти ва кўргазмали парвозлар билан танишди. Атилла Гулан Ўзбекистон ҳарбий мутахассисларининг билим ва тажрибаларини юқори баҳолаб, келгусида соҳа йўналишида ташкил этиладиган амалий ишлар икки мамлакат ўртасидаги ҳарбий алоқаларни янада мустаҳкамлашга хизмат қилишини таъкидлаб ўтди.
Туркия ҳарбий делегациясининг Ўзбекистонга ташрифи давом этмоқда. Режага мувофиқ, 27 апрель куни делегация вакилларининг Қарши шаҳридаги Ўзбекистон Олий ҳарбий авиация билим юрти фаолияти ҳамда Самарқанд шаҳрининг тарихий обидалари билан танишиши ҳам кўзда тутилган.
Изоҳ (0)