Украина аёллар учун мажбурий ҳарбий хизматни жорий этиши ва бу борада Исроил тажрибасини ўрганиши керак. Украина президенти офиси раҳбари ўринбосари Павел Палиса тегишли таклифни илгари сурди.
Амалдор ўз ташаббусини Россия томонидан узоқ муддатли таҳдид мавжудлиги билан изоҳлади. У яқин 10 ёки ҳатто 30 йил ичида украиналиклар “ҳамма нарса такрорланиши мумкинлигини тушуниб яшашга мажбур бўлиши”ни айтди. Чунки Россия Украинанинг мустақиллигини “йўқ қилмоқчи” эканини таъкидлади.
Етарлича кучли бўлиш ва фуқароларни армияга жалб қилишда ҳеч қандай муаммо бўлмаслиги учун, маълум бир ўтиш даврини режалаштириш керак, шунда фуқаролар ҳар бир кишининг хизмат қилишини аниқ тушуниб етади, деди Павел Палиса.
У бундай талаб Конституцияда белгиланганини эслатиб, уни аёлларга ҳам татбиқ этишга чақирди. Палисанинг фикрича, бюджет ҳисобидан ижтимоий тўловлар, давлат лавозимлари ва таълим олиш учун армияда хизмат қилишни мажбурий шартга айлантириш керак.
Майли бир йиллик минимал шартнома бўлсин. Эркаклар ва аёллар армияда бўлсин. Айниқса, ҳамма учун турли хил ишлар мавжуд бўлган замонавий шароитда, деди у.
Палиса шу тариқа аҳоли Қуролли кучлар фаолиятини тушини маълум қилди
Агар биз фарзандларимиз бахтли бўладиган давлат қурмоқчи бўлсак, бу тушунча авлоддан авлодга ўтиши керак, деди Зеленский офиси вакили.
Унинг қўшимча қилишича, барча украиналиклар шунчалик кучли бўлиши керакки, ҳеч бир қўшни ёки бошқа “беқарор шахслар”да “2022 йилни такрорлаш” хаёлига ҳам келмаслиги керак. Палиса бу унинг шахсий фикри эканини айтди ва у Президент идораси бу фикрга қўшилишига ишончи комил эмас.
Сентябрь ойи охирида Украина Қуролли кучлари сафида 68 минг аёл бор эди, улардан 48 минг нафари ҳарбий хизматчилар, 5 мингга яқини бевосита жанговар ҳаракатлар зонасида бўлган.
Бугун аёллар ҳамма жойда: фронт ортида, оғир лавозимларда ишлайди, УҚК сафида жанг қилади. Улар одамларни жинсига қараб эмас, балки уларнинг имкониятлари, самарадорлиги ва ақл-заковатига қараб баҳолаш кераклигини исботлайди, деган Украина Мудофаа вазирлиги давлат котиби Людмила Дараган.
Изоҳ (0)