Нигериянинг Замфара штатида ҳарбийлар томонидан амалга оширилган ҳаво ҳужуми оқибатида камида 20 нафар тинч аҳоли вакили ҳалок бўлди. Бу ҳақда Al Jazeera хабар берди.
Ҳарбийлар тинч аҳоли яшайдиган ҳудудларга “террорчилар” ҳужум қилишга тайёрланаётгани ҳақида маълумот олгач, авиаҳужум уюштирган.
Қўшимча разведка маълумотлари бандитлар айрим деҳқонларни ўлдирганини ва бир қанча тинч аҳолини, жумладан, аёллар ва болаларни ўғирлаб кетганини тасдиқлаган, дейди ҳаво кучлари комодори Эҳимен Эжодаме.
У авиаҳужумда икки фуқаро ҳалок бўлгани ва яна икки киши яраланганини айтган. Бироқ маҳаллий аҳоли сўзларига кўра, ҳарбий самолёт жиноятчиларни эмас, уларни қувиб борган фуқароларни адашиб нишонга олган.
Шанба куни (31 май) биз икки карра фожиани бошимиздан кечирдик: ўнлаб одамларимиз ва чорва молларимизни бандитлар олиб кетди. Уларни қувиб борган одамларимизни эса ҳарбий самолёт ўққа тутди. Бу ҳужумда 20 киши ҳалок бўлди, деди жабрланган ҳудуд аҳолиси вакили Буҳари Дангулби.
Аҳолининг айтишича, бандитлар аввал Мару туманидаги Мани ва Ваби қишлоқларига ҳужум қилиб, қорамолларни ўғирлаган ва бир нечта одамни олиб кетган. Ҳаво кучларини айнан ушбу қишлоқлар аҳолиси ёрдам сўраб чақирган. Ҳодиса юзасидан Нигерия Мудофаа вазирлиги ҳозирча изоҳ бермаган.
Изоҳ (0)