Россия Адлия вазирлиги фуқаролиги бўлмаган шахсларга Россия Федерацияси Қуролли кучларида шартнома асосида хизмат ўташга рухсат бериш таклифини илгари сурди. Бу ҳақда ТАСС агентлиги хабар бермоқда.
“Қонун лойиҳаси билан “Ҳарбий мажбурият ва ҳарбий хизмат тўғрисида”ги федерал қонунга ўзгартиришлар киритилмоқда. Унга кўра, фуқаролиги бўлмаган шахсларга Россия Федерацияси Қуролли кучлари ва ҳарбий тузилмаларида ҳарбий хизматни ўташ тўғрисида шартнома тузиш ҳуқуқи берилиши назарда тутилган”, дея таъкидланган ҳужжатда.
Шунингдек, “Мудофаа тўғрисида”, “Ҳарбий хизматчиларнинг мақоми тўғрисида”, “Россия Федерациясида давлат пенсия таъминоти тўғрисида”, “Россия Федерациясида давлат хизмати тизими тўғрисида”ги ва бошқа бир қатор федерал қонунларга тегишли ўзгартиришлар киритиш таклиф этилмоқда.
Қонун лойиҳаси Россия Федерацияси Ички ишлар вазирлиги, Федерал хавфсизлик хизмати, Ташқи ишлар вазирлиги, Жазони ижро этиш федерал хизмати ва Мудофаа вазирлиги билан келишилган. Бундан ташқари, ҳужжат қонун лойиҳалари фаолияти бўйича ҳукумат комиссияси томонидан маъқулланган.
Россия юристлар ассоциацияси бошқаруви раиси Владимир Груздев қонун лойиҳаси билан ҳарбий хизматни ўташ бўйича шартнома тузишни истаган фуқаролиги бўлмаган шахсларга чет эл фуқаролари эга бўлган ҳуқуқ ва мажбуриятларни бериш таклиф этилаётганини маълум қилди.
“Амалдаги қонунчиликка кўра, чет эл фуқаролари шартнома бўйича ҳарбий хизматни фақат “офицер бўлмаган” лавозимларида - аскар, матрос, сержант ва старшина сифатида ўташи мумкин. Худди шу чекловни фуқаролиги бўлмаган шахсларга ҳам татбиқ этиш таклиф қилинмоқда”, дейди у.
Изоҳ (0)